德意志之歌

  想搵東德嘅國歌嘅話，請睇掃清廢墟，重建家園。

《德意志之歌》（粵拼：dak1 ji3 zi3 zi1 go1，德文：Deutschlandlied；原題《德意志人之歌》，德文：Das Lied der Deutschen）係德國現行嘅國歌。

Deutschlandlied

德意志之歌
馮·法勒斯利賓嘅歌詞手稿嘅掃瞄。
德國國歌
作詞	August Heinrich Hoffmann von Fallersleben，1841年
作曲	海頓 ，1797年
採用	1922年/1952年
音樂試聽
純音樂版 noicon

歷史

奧古斯特·海因列施·荷夫曼·馮·法勒斯利賓

1841年德意志邦聯版圖同《德意志之歌》裏邊嘅德國四極（馬斯河、美默爾河、艾慈河同埋卑爾特海峽）嘅對照。

現行德國國歌曲譜

1841年，喺普魯士布里斯留（今日嘅波蘭傅羅茨華夫）教書嘅詩人奧古斯特·海因列施·荷夫曼·馮·法勒斯利賓（August Heinrich Hoffmann von Fallersleben）寫徂一首叫做《德意志人之歌》嘅詩，配上奧地利作曲家海頓寫嘅奧地利皇室頌歌《帝皇頌》（Kaiserlied）嘅旋律，成為一首頌歌。首詩一開頭就開門見山恁表示「德國德國高於一切」，表示馮·法勒斯利賓希望德意志各邦最終成為一個統一嘅國家；而第三段開頭嗰句歌頌「統一、法制同自由」（「Recht」有「法制」同「正義」嘅意思），係因為馮·法勒斯利賓希望統一之後嘅德國會成為法治國家，而唔再係君主專制國家^[1]。

1871年德意志帝國建國之後，為徂唔同關係依然緊張嘅奧地利用同一首國歌，採用徂跟英國國歌填詞嘅皇室頌歌《獻上勝利花冠》（Heil dir in Siegerkranz）做國歌。1922年威瑪共和國建國之後，《德意志之歌》嘅三段歌詞全部被威瑪共和國第一任總統腓特列·毅伯特（Friedrich Ebert）選徂做國歌。納粹黨上臺之後，唔單止指定淨係准第一段（「德國德國高於一切」）做國歌，更加規定每次奏完國歌之後要馬上跟著奏納粹黨黨歌^[2]。第一段歌詞就係喺爾嗰時期同納粹黨扯上糾纏唔清嘅關係嘅^[3]。

1945年納粹德國投降之後，《德意志之歌》同其他納粹象徵一齊被盟軍佔領當局禁澌。1949年西德建國嘅時候，有輿論認為德國應該採用蕭勒作詞，貝多芬作曲嘅《歡樂頌》做國歌，但係爾種諗法缺乏支持。1952年4月29號，西德總理江拉德·阿登納寫信畀總統提奧鐸·海斯，勸海斯用返《德意志之歌》做國歌，但係祗將第三段（「統一、法制同自由」）作為歌詞^[4]。同年5月2號，海斯回信畀阿登納，同意定《德意志之歌》第三段歌詞為國歌^[4]。爾兩封信後來都喺西德政府簡報裡邊出現徂。從此以後《德意志之歌》嘅第三段歌詞就做徂德國國歌，而第一同第二段歌詞喺正式場合已經唔可以再唱。

喺2011年世界皮划艇錦標賽期間，德國皮划艇選手安娜·古諾亞（Anne Knorr）同迪波拉·聶莎（Debora Niche）贏徂金牌之後，匈牙利主辦方唔知係有心定無意，播徂唱第一段歌詞嘅《德意志之歌》，結果引發德國方面強烈抗議^[5]。

歌詞

德文原詞	粵語翻譯
第一段
Deutschland, Deutschland über alles, über alles in der Welt, Wenn es stets zu Schutz und Trutze Brüderlich zusammenhält! Von der Maas bis an die Memel, Von der Etsch bis an den Belt: Deutschland, Deutschland über alles, Über alles in der Welt! Deutschland, Deutschland über alles, Über alles in der Welt!	德國，德國，高於一切， 高於世上嘅一切。 無論何時，為徂捍衛佢，[註 1] 好似兄弟喺一齊。 馬斯河到美默爾河， 艾慈河到卑爾特海峽。 德國，德國，高於一切， 高於世上嘅一切！ 德國，德國，高於一切， 高於世上嘅一切！
第二段
Deutsche Frauen, deutsche Treue, Deutscher Wein und deutscher Sang Sollen in der Welt behalten Ihren alten schönen Klang, Uns zu edler Tat begeistern Unser ganzes Leben lang: Deutsche Frauen, deutsche Treue, Deutscher Wein und deutscher Sang! Deutsche Frauen, deutsche Treue, Deutscher Wein und deutscher Sang!	德國婦女，德國忠誠， 德國美酒，德國歌聲； 遍及世界，永遠保持 古老高貴嘅聲與名； 激勵我等事業高尚， 即便要窮盡一生。 德國婦女，德國忠誠， 德國美酒，德國歌聲！ 德國婦女，德國忠誠， 德國美酒，德國歌聲！
第三段 （德國現行國歌）
Einigkeit und Recht und Freiheit Für das deutsche Vaterland! Danach lasst uns alle streben Brüderlich mit Herz und Hand! Einigkeit und Recht und Freiheit Sind des Glückes Unterpfand; Blüh' im Glanze dieses Glückes, Blühe, deutsches Vaterland! Blüh' im Glanze dieses Glückes, Blühe, deutsches Vaterland!	祈願統一、法制、自由 歸於德意志祖國，[註 2] 為此我等一起奮鬥， 好似兄弟手心相連。 統一、法制同埋自由， 係我等幸福保證。 福光普照　花開燦爛，[註 3] 德意志祖國你要璀璨！ 福光普照　花開燦爛， 德意志祖國你要璀璨！