怪獸與鄧不利多的秘密
From Wikipedia, the free encyclopedia
Remove ads
《怪獸與鄧不利多的秘密》（英文：Fantastic Beasts: The Secrets of Dumbledore）係2022年嘅一套英美合拍嘅奇幻片，呢套戲由大衛·葉斯執導，J·K·羅琳同史提夫·克羅夫斯一齊寫劇本。呢套戲係由2001年羅琳嘅小說《怪獸與牠們的產地》改編嘅，係2018年嘅電影《怪獸與葛林戴華德之罪》嘅續集，亦都係第３輯怪獸系列電影，同時亦都係魔法世界嘅第１１套戲。呢套戲由艾迪·烈柏尼、祖迪·羅、艾薩·米勒、丹·方格、艾歷遜·蘇度、哥倫·杜納、謝茜嘉·威廉斯、嘉芙蓮·禾達史東、麥斯·米基辛主演。
呢套戲嘅場景設定喺上一集事件嘅幾年之後，講述阿不思·鄧不利多派紐特·斯卡曼德同其他幾個人去做唔同嘅任務，要佢哋直接入到去黑巫師蓋勒·葛林戴華德軍隊嘅中心。
怪獸系列一開始已經講明最少會係個三部曲，呢套戲嘅主體拍攝原定喺2020年年頭開始拍[5]，2020年11月上畫，後來因為武漢肺炎大爆發疫情而推遲去到2020年9月先開始拍[6]，最後要推遲去到2022年7月先至上映[7]。頭兩輯戲嘅大部分主要演員喺2020年3月確認咗佢哋會參與拍第３輯。尊尼·特普喺頭兩輯做葛林戴華德，原定第３輯都係搵返佢，而佢亦都真係拍咗１日嘅獨角戲[8]，不過因為佢輸咗同英國《太陽報》嘅毀謗官司，結果被要求喺2020年11月退出呢套戲。佢嘅角色後嚟由米基辛頂上，呢套戲喺2021年2月殺青。
《怪獸與鄧不利多的秘密》2022年3月29號喺倫敦皇家節日音樂廳首映[9]，華納兄弟電影喺同年4月8號喺英國上映呢套戲，而4月15號就喺美國上映。呢套戲反應兩極，不過大致同意比起上一套有進步，而祖迪·羅同米基辛嘅表現被大讚。套戲預算$2億，票房$2.84億，全球票房超過4.07億美金，截至同年4月係巫師世界系列入面票房最低嘅電影，亦係022年票房第５位嘅戲。
Remove ads
劇情
1932年，紐特喺中國桂林幫一隻麒麟生bb，麒麟有睇穿一個人嘅靈魂同預知未來嘅能力。與此同時，魁登斯帶領幾個葛林戴華德嘅追隨者襲擊並且殺死咗隻母麒麟，同埋捉走咗新生嘅麒麟bb。葛林戴華德隨後殺咗麒麟bb去奪取佢預知未來嘅能力。然而，佢哋唔知嘅係，麒麟生嘅係孖仔，紐特救走咗細嗰隻。
阿不思·鄧不利多同葛林戴華德之間有血盟，無辦法攻擊對方，所以佢搵咗紐特、佢阿哥西瑟·斯卡曼德、伊法魔尼嘅魔咒學教授拉莉·希克斯、法國塞內加爾裔巫師尤瑟夫·卡瑪、美國莫魔雅各布·科沃斯基同紐特嘅助手邦媞去阻止葛林戴華德想統治世界嘅陰謀。尤瑟夫被派去葛林戴華德嗰邊做卧底，而其他人就被派去德國柏林。喺嗰度，佢哋目擊國際巫師聯合會（ International Confederation of Wizards, ICW）撤消對葛林戴華德嘅所有控罪，並容許佢去參選競爭最高領袖（Supreme Mugwump）嘅職位。
葛林戴華德嘅追隨者滲入咗德國魔法部，捉走咗西瑟，又計劃暗殺嚟自巴西嘅競選對手維森西婭·桑托斯。鄧不利多安排咗新任務：叫紐特去救返佢阿哥，拉莉去阻止暗殺計劃。紐特成功喺德國嘅秘密監獄救返佢阿哥，拉莉同雅各布都成功阻止咗暗殺計劃，但係喺逃走嗰陣雅各希被人屈想刺殺葛林戴華德。佢莫魔嘅身份畀咗葛林戴華德一個向麻瓜世界開戰嘅藉口。與此同時，葛林戴華德派魁登斯去殺鄧不利多，鄧不利多好快就打低咗魁登斯，後尾發現佢竟然係細佬阿波弗·鄧不利多嘅私生仔-阿留思·鄧不利多。
巫師世界嘅領袖雲集不丹，打算用古老傳統嘅方法嚟選出新一任首領：由麒麟向心靈純潔而善良嘅人鞠躬。葛林戴華德用招魂術控制之前殺死嘅麒麟，控制佢喺麒麟巡禮（Walk of the Qilin）上邊向佢鞠躬，操控選舉。葛林戴華德一上任就向麻瓜世界宣戰，並對「試圖刺殺佢」嘅雅各布施以酷刑咒。魁登斯、紐特同邦媞嚟到揭發葛林戴華德，紐等打開由邦媞帶嚟現場嘅行李箱，攞出倖存嘅另一隻麒麟。麒麟先向鄧不利多鞠躬，鄧不利多拒絕做首領之後佢又向桑托斯鞠躬。葛林戴華德怒火中燒，試圖殺死魁登斯，阿不思同阿波弗出手保護，阿波弗救走咗阿留思，而阿不思同葛林戴華德嘅咒語撞埋一齊，解除咗佢哋之間嘅血盟。兩人隨即一翻戰鬥，戰鬥其間佢哋感受到對方嘅心跳，雙雙收手無再打落去，葛林戴華德消影撤退。
最後，阿波弗同魁登斯相認，一齊返屋企。雅各布同奎妮喺雅各布嘅麵包店結婚，一班人同蒂娜·金坦前來道賀。鄧不利多喺遠處注視兩人成婚，多謝紐特幫手，之後就獨自消失喺茫茫夜色中。
Remove ads
演員
| 演員 | 角色 | 簡介 |
| 艾迪·烈柏尼 Eddie Redmayne | 紐特·斯卡曼德 Newt Scamander[10] |
英國魔法部怪獸分部奇獸管理控制部嘅僱員，而且係一個魔法動物學家。 |
| 祖迪·羅 Jude Law | 阿不思·鄧不利多 Albus Dumbledore[11] |
極具影響力、強大嘅英國巫師，霍格華茲魔法與巫術學校現任黑魔法防禦術教授，同葛林戴華德有一段漫長而神秘嘅關係。 |
| 艾薩·米勒 Ezra Miller | 魁登斯·巴波／阿留思·鄧不利多 Credence Barebone／Aurelius Dumbledore[11] |
瑪莉·盧·巴波嘅養仔，長期遭受養母暴力虐待。喺紐約戰役後化成一小縷闇黑怨靈逃脫。依家嘅魁登斯可以完全控制佢嘅闇黑怨靈。 |
| 丹·方格 Dan Fogler | 雅各布·科沃斯基 Jacob Kowalski[11] |
莫魔，曾經參加過第一次世界大戰嘅退伍軍人，依家係一間麵包店嘅主人。紐特嘅朋友，鍾意奎妮。 |
| 艾歷遜·蘇度 Alison Sudol | 奎妮·金坦 Queenie Goldstein[11] |
蒂娜又靚又活潑嘅妹妹。喺蒂娜被降職之後，奎妮喺魔杖許可局到返工。奎妮係一個天生嘅破心者並愛上咗雅各布。喺上一部加入咗葛林戴華德嘅陣營。 |
| 卡倫·透納 Callum Turner | 西瑟·斯卡曼德 Theseus Scamander |
紐特嘅阿哥，係人人讚頌嘅戰爭英雄，亦都係魔法部首席正氣師。 |
| 潔西卡·威廉斯 Jessica Williams | 尤拉莉·「拉利」·希克斯教授 Professor Eulalie "Lally" Hicks[11] |
伊法魔尼魔法與巫術學校嘅教授。 |
| 嘉芙蓮·禾達史東 Katherine Waterston | 蒂娜·金坦 Tina Goldstein[11] |
MACUSA嘅首席正氣師。 |
| 麥斯·米基辛 Mads Mikkelsen | 蓋勒·葛林戴華德 Gellert Grindelwald[12][13] |
惡名昭彰嘅強大黑巫師，喺全球造成大規模暴力、恐怖同混亂事件。喺紐約被MACUSA拉咗之後成功逃脫。 |
| 威廉·奈迪蘭 William Nadylam | 尤瑟夫·卡瑪 Yusuf Kama |
一位塞內加爾裔法國巫師，花咗好多年時間搵魁登斯。莉塔·雷斯壯同母異父嘅哥哥。 |
| 維多利亞·葉慈 Victoria Yeates | 邦媞 Bunty |
紐特嘅助手。 |
| 帕琵·柯比-圖奇 Poppy Corby-Tuech | 維達·羅西爾 Vinda Rosier |
葛林戴華德忠誠嘅追隨者。 |
| 理查·柯伊爾 Richard Coyle | 阿波佛·鄧不利多 Aberforth Dumbledore |
阿不思·鄧不利多嘅細佬，活米村豬頭酒吧嘅老閣，魁登斯嘅生父。 |
| 奧立佛·麥蘇希 Oliver Masucci | 安東·沃格爾 Anton Vogel |
德國魔法部部長兼國際巫師聯合會前會長。 |
| 瑪麗亞·費爾南達·坎迪多 Maria Fernanda Cândido | 維森西婭·桑托斯 Vicência Santos |
國際巫師聯合會會長侯選人兼巴西魔法部部長。 |
| 蜚安娜·葛拉絲戈特 Fiona Glascott | 米奈娃·麥 Minerva McGonagall |
霍格華茲嘅教授，鄧不利多兄弟嘅朋友。 |
Remove ads
製作
發展
2014年10月，華納兄弟宣佈呢系列嘅電影「至少」會係一個三部曲，而第三集將會喺2020年11月20號上映[14][15]。
2016年7月，導演大衛·葉斯確認J.K. 羅琳已經有第三輯電影劇本嘅構思[16]。同年10月，據報導《怪獸系列電影》將會有五部電影，羅琳、David Heyman、Steve Kloves、Lionel Wigram做監製，而艾迪·烈柏尼會回歸，做呢個系列嘅主角紐特·斯卡曼德[17]。11月，葉斯透露佢會為成個系列五套戲執導，話「我鍾意拍戲，而且我有一隊好好嘅團隊，佢哋好似家人一樣。」[18]
2018年10月，尊尼·特普暗示佢會返嚟第三部做返蓋瑞·葛林戴華德嘅角色，而電影會喺2019年年中開始拍攝。[19]
2019年2月7號，據透露電影嘅背景設喺1930年代，故事講述巫師世界捲入第二次世界大戰，除咗頭兩集講過嘅美國同英國嘅魔法政府之外，仲講埋不丹、德國同中國嘅魔法社區[20][21]。同年11月，華納兄弟發佈一份新聞稿，宣佈電影劇本由羅琳同克羅夫斯一齊寫[22]，第三部電影設定喺巴西，主要拍攝地點會係巴西里約熱內盧，並且會喺2020年春季開始製作，之前曾經擔任《哈利波特》電影編劇嘅史提夫·克羅夫斯將會以聯合編劇嘅身分加入。[17][22][23]
選角
2020年3月，據報導祖迪·羅、尊尼·特普、艾薩·米勒、艾歷遜·蘇度、丹·方格、Callum Turner、嘉芙蓮·禾達史東、艾迪·烈柏尼都確定咗會做返上一集嘅同樣角色[24]。金秀賢做嘅蛇女納吉尼並無喺第三部出現，有推測話可能因為拍攝檔期係佢啱啱生完個女嘅時間，亦都有推測話本來第三部劇本就係無納吉尼呢個角色[25]。頭兩部做阿伯內西嘅Kevin Guthrie原定都會返嚟，不過因為性侵犯被定罪被劇組炒咗。[26][27][28]
同年11月，尊尼·特普宣佈因為佢同英國太陽報嘅官司導致公眾形象欠佳，被華納兄弟要求辭演。[29]佢喺開拍之後淨係拍咗一場戲，但係佢嘅合約寫明無論套戲拍唔拍得完都要出糧畀佢，而據報佢嘅片酬係大約1000萬至1600萬美金之間。[30]喺11月25號，華納兄弟宣佈麥斯·米基辛會代替尊尼·特普做蓋瑞·葛林戴華德嘅角色。[13][31][32]米基辛選擇唔去模仿特普嘅演繹，佢話咁樣會係「創造性自殺」（creative suicide），但承認依然需要「同之前發生嘅事築起某種橋樑」[33]。
拍攝
主體拍攝最初定喺2019年7月開始，但係喺2019年1月，由於《怪獸與葛林戴華德之罪》嘅票房比預期少，華納兄弟宣佈為咗有更多時間完善劇本同埋計劃好未來嘅電影，製作被推遲至2019年尾[34]。2019年10月，丹·方格話第三部電影嘅主體拍攝會喺2020年2月開始[35]。
之後主體拍攝就定咗喺2020年3月16號開始，但係因為武漢肺炎肆虐，華納兄弟推遲咗電影嘅製作[24][36]。2020年8月20號，電影獲確認會喺9月喺英國開始拍攝[37]。拍攝喺9月20日正式開始，並有採取安全預防措施，以確保演員同工作人員免受武漢肺炎嘅傷害[38][39]同日，烈明尼證實電影已經開始拍攝[40]。2021年2月3號，一名工作人員嘅武漢肺炎檢測呈陽性，喺英國華納兄弟利維斯登工作室嘅拍攝工作被暫停[41][42][43]。雖然呢部電影以柏林同不丹為背景，但並唔係喺真實地點拍攝。佢哋喺利夫斯登華納兄弟工作室嘅外景同攝影棚到被重新構想同埋重建[44]。
市場營銷
發行
反應
票房
評價
參考資料
Wikiwand - on
Seamless Wikipedia browsing. On steroids.
Remove ads