收數

收數／追債乃落力驅使債仔還債之行為——種類繁多，有啲合法，有啲犯法。

債仔屋企坺牆俾收數友畫花咗

類

黑

非法放數人／集團，例如大耳窿，好多時會自己處理哂全部收數程序，而由於啲交易由一開始就已經犯法，佢哋要人哋還錢時自然唔會介意高調使出嗱喳招，譬如用到喺目標屋企門口淋紅油、寫大字、塞鎖匙窿呢類恐嚇同毀壞手段。^[1]呢行喺流行文化當中嘅形象，大致嚟自佢哋。^[2]其實更令行外人反感嘅綁架及勒索等收數方式，都甚為常見，尤其是當債項揩到賭呢一瓣時；^[3]實行起嚟不惜跨境越國，偶然重會搞出人命㖭。^[4]

白

合法嗰啲放數者，例如正規嘅銀行及財仔，遇到客人唔依時還錢，會首先自己用明顯合法而且成本低嘅技倆收數，例如寄信同打電話。^[5]佢哋會依靠盤用精密科學計出嚟嘅數，決定喺乜嘢時候縱容下人哋拖數（令利息滾大……），以及幾時用焉招及畀幾多壓力催促還錢（避免對方見冇辦法清還而自行破產，索性唔還……）；^[6]佢哋亦有精於談判嘅職員，會喺若干情況同部分債仔講數（尤其是當嗰筆數冇抵押或者抵押品價值過低……），務求公司得到最多利益，有時會讓步——^[7]例如向處於困境嘅大財團借多啲錢，博對方捱得過危機兼將新舊債項一齊清還；^[8]又例如降低對個人債仔嘅索價，務求同其他債主爭奪佢僅有嘅財富，蝕少啲算數；^[9]對於特別棘手嘅個案，重會用到成本頗高嘅方法，例如嘗試經法庭，強制轉移其資產到自己手上，或者外判啲任務畀收數公司。^[10]

灰

收數公司嘅盈利方式，係接受放數人委託，追債仔還錢；^[11]成功就收走總數之中嘅一大忽作為報酬。^[12]佢哋專做啲遊走於法律之邊緣或灰色地帶嘅嘢，為唔識得該類專業技術嘅人解難，以及替唔想整污糟自己對手嘅合法企業代勞。^[13]佢哋拿捏尺度時好小心，務求令債仔感受到威脅，而又未至於令到自己俾皇氣拉——電話搞鬼、郵件滋擾及真人恐嚇等都好常用；^[14]盡量唔玩人身暴力或財物毀壞。^[15]雖然佢哋當中的確有部分會派人專做犯法嘢，但係一般都同時戴好頭盔，逃避罪責。^[16]

詞

追數既可以解「追債」，亦可以指上司迫下屬開工時整夠某個生意額。^[17]有同樣意思嘅攞債較為老套，家陣往往興用作比喻，例如講因果報應。^[18]