數據

  「資料」跳轉到呢度。假如你想揾嘅係其他用法，請睇「資料 (搞清楚)」。

  呢篇文章講嘅係描述事物嘅紀錄。假如你想揾嘅係電腦對符號串嘅處理，請睇「電腦數據」。

數據（粵拼：sou3 geoi3）係指描述事物嘅符號（多數係文字同數）資訊記錄，透過量度得出。亦都有圖片資料同映片資料等。喺科學同工程等嘅領域，做研究嘅人會用各種嘅數據嚟描述研究緊嘅現象，並且用統計等嘅方法對數據進行分析，從而得出結論。

棒形圖可以用嚟展示數據。

數據呢個概念，日常粵語口語時常會借英文嗌做 data（粵拼：粵化口語音：dei1 taa4）而台灣就比較興嗌做資料。

收集數據

内文：收集數據同原始數據

睇埋：數據集

數據可以由唔同來源搜集返嚟，以下係幾種常見嘅數據來源：

• 觀察：研究者可以親身觀察人、動物或者現象，例如記錄行人過馬路嘅行為、觀察學生上課嗰陣嘅反應等等。
• 問卷調查：透過紙本或者網上表格，向用家、顧客或者研究對象收集佢哋嘅意見、偏好或者背景資料。
• 實驗：喺控制環境下進行測試，例如心理實驗等，根據變項改變睇參與者反應。
• 感應器：例如溫度感應器、GPS、心跳監測器、交通探測器，會自動輸出連續嘅數值。

... 等等^[1]。

用自由開源網絡應用程式 LimeSurvey 整嘅一份網上調查；呢份調查有條問題，受訪者可以喺問題下便嘅空間打自己嘅答案。

原始數據係指未經過處理、清洗或者分析嘅「第一手」數據。呢啲數據可以係嚟自觀察、實驗、問卷、感應器等直接收集返嚟、未經過分析、整理嘅數據。例如問卷調查中每一位受訪者嘅回答、網站伺服器日誌中每一次點擊紀錄、溫度感應器每秒報告嘅數值... 等，都可以算係原始數據。由於原始數據通常包括錯誤、遺漏或者冗餘資訊，實際郁手做分析前，分析者通常要做一啲處理，先至可以令啲數據變得有用。原始數據喺科研、統計分析同埋機器學習入面都係極之重要嘅起點^[2]。

分析數據

内文：數據分析

睇埋：統計分析同實驗組同對照組

數據分析係指攞住搜集到嘅數據，運用統計學等嘅方法去理解背後嘅規律、趨勢同關係。

分析可以係純描述性質嘅，例如喺流行病學（會研究疾病嘅傳播）入面，研究者手上有一啲空間性質嘅數據，譬如而家爆發新嘅流感，研究者要睇粵港澳唔同地點嘅疾病個案數，研究者可以用純描述性質嘅分析去畫地圖、計每區嘅發病率，搵出疾病嘅分佈跟咩規律，可能發現隻新流感喺香港出現得特別多，就可以算係搵到有用嘅資訊^[3]。

喺自然科學同社會科學上，研究者成日會用假說檢定嘅做法。假想研究者想知某隻新藥係咪能夠改善專注力（可能可以用嚟幫助過度活躍症嘅患者），噉就唔可以淨係用描述性質嘅分析。佢哋好可能會設計實驗，例如搵兩班人返嚟，一班人服新藥，一班人就做對照組，服食安慰劑，其後比較兩組喺專注力測試上嘅表現，得出兩組嘅平均值，攞住呢個平均值，佢哋可以做 t-測試，睇吓兩者之間係咪真係有顯著嘅差異。如果係嘅，佢哋就有信心可以話呢隻藥對專注力有幫助^[4]。

資訊科技都會用到各種數據。做電腦保安嘅專業人士會設計系統，紀錄用家或裝置嘅 IP 位址，以及係呢啲 IP 位址嘅相關資訊，好似係每次簽到嘅時間、來源地點、請求類型... 等嘅數據，方便做審查。例如某間銀行，佢嘅數據庫記低咗阿明呢位客戶嘅 IP 位址同埋簽到時間，而阿明不嬲係中午至挨晚登入嘅，假如某次活動發現佢個 IP 位址特別唔尋常（例如喺半夜三點登入）就可能表示呢次活動有景轟^{[註 1][5]}。

英維有功能，可以封鎖某啲 IP 位址，假如某個位址硬係有異常活動，管理員可以封鎖佢哋。粵維都有噉嘅功能。

公共健康研究亦會用到數據，簡單嘅可以係分析邊啲人有健康方面嘅問題，例如下圖噉，幅圖反映二〇一六年世界各地嘅數據，描繪唔同地區分別有幾多 % 嘅大人身體活動量不足：

唔同類嘅數據嘅性質好唔同，而分析者要視乎情況決定用咩分析先至適合。例子：人類行為相關嘅數據喺偏度等嘅統計特性上有一定嘅既定特性，唔跟常態分佈，而好似因素分析等嘅統計分析法假設咗變數呈常態，所以呢啲變數就唔可以就噉直接用因素分析嚟處理。

睇埋

• 資料庫 / 數據庫
• 數據科學
• 維基數據
• 異常值

註釋

1. 可以睇吓異常檢測。