文法格

按功能分類名詞同修飾詞 From Wikipedia, the free encyclopedia

文法格
Remove ads

文法格（粵拼：man4 faat3 gaak3；英文：grammatical case），又叫語法格、語格或者格，係語言文法上嘅一個概念。簡化講可以想像成詞「喺句子入面扮演咩角色」。喺好多語言當中，詞要按照佢屬邊個格而變樣。

Thumb
爾幅歐洲地圖，顯示歐洲各地語言分別有幾多款文法格，當中德文（分佈喺德國、奧地利同瑞士等地）有 4 款文法格。睇得出
(a) 羅曼語言（法文、意大利文、西班牙話、葡萄牙話、加泰羅尼亞話... 等）雖然係拉丁文嘅語言後代，但冇嗮文法格詞形變化[1]。
(b) 芬蘭-烏戈爾語言（芬蘭話、愛沙尼亞話同匈牙利話等；睇紅紅哋色嗰幾笪）有異常咁多文法格。

受文法格影響嘅有名詞同相關修飾語（包括代詞、形容詞、分詞或者數詞等），而格嘅改變就係用嚟表示爾啲詞語喺句法上嘅功能。例如响拉丁文裏面，一隻名詞可以視乎「佢喺句子入面扮演咩角色（例如做緊主語定賓語）」而出現變格[2]；用粵語噉嘅方式嚟講嘅話，想像有隻叫做 L 嘅語言，L 同粵語一樣咁滯，分別在於 L 有複雜過粵語嘅變格，噉 L 可能會有噉嘅文法規則－

噉 L 就會有好似噉嘅句子－

「我 je1 惜嗮貓貓 ji1。」（我 = S；貓貓 = O）
→ 相應粵語：「我惜嗮貓貓。」
「隻貓 je1 追住隻老鼠 ji1。」（貓 = S；老鼠 = O）
→ 相應粵語：「隻貓追住隻老鼠。」

好似粵語、客家話同標準官話等嘅漢語，好少可會用到格同變格。不過，世上有唔少語言都有頗為複雜嘅文法格系統（尤其係印歐語言），當中仲不乏一啲影響力巨大嘅語言，例如對眾歐洲語言（包括英文）影響深遠嘅拉丁文就有變格爾家嘢，除此之外，會用變格嘅語言仲有梵文、德文、俄羅斯話 、波斯話、愛爾蘭蓋爾話、芬蘭話同巴斯克話[註 1]... 呀噉[3]。

Remove ads

格詞形變化

内文：詞形變化同變格

印歐[歐 1]語言出嗮名好多成員都有豐富嘅文法格詞形變化。印歐語言係一個好大嘅語系，包咗好多隻南亞嘅主流語言以至絕大多數嘅歐洲語言－印度-雅利安語支（尼泊爾話、印度斯坦話、馬拉提話等）、波斯話、斯拉夫語言（烏克蘭話同俄羅斯話等）、羅曼語言（法文同意大利文等）、日耳曼語言（包括英文）、島嶼蓋爾特語言... 等等，都屬於印歐語言，即係話呢個語系「東至印度，西至歐洲」[3]。

首先睇吓英文。遠古嘅英文曾經有相當複雜嘅格詞形變化。廿一世紀初嘅英文已經演變到冇乜格詞形變化可言，得返好似代名詞等嘅少數詞語會有格詞形變化[4]：

  1. He bites the dog.
    → 粵譯：「佢咬隻狗。」
  2. The dog bites him.
    → 粵譯：「隻狗咬佢。」

留意吓啲名詞：响句 1 當中，He（男性佢）係咬人嗰方，係句子嘅主語[歐 2]（S），而句 2 當中嘅 him（男性佢）係被咬嗰方，係句子嘅賓語[歐 3]（O）。即係話英文入面嘅男性佢要隨住「做緊句子嘅主語定賓語」（句法功能）而變樣－做主語嗰陣隻詞要變做 he 而做賓語嗰陣隻詞要變做 him 噉。有唔少語言會有更多樣嘅格詞形變化，好似係拉丁文[5]、德文或者俄羅斯話噉；對於呢啲語言，可以想像吓「做主語做賓語隻詞會唔同咗樣」噉嘅情況，唔淨只係用喺 he 同 she 等嘅代名詞度，仲會普遍噉用喺啲名詞身上。

印歐八格

睇埋：印歐語系

傳統上，印歐語言有以下呢八大格，當中啲例句用咗粗體嚟標示對應嗰款格嘅詞[6][7]：

More information 格, 表示啲乜資訊 ...

由上面睇得出，英文嘅格詞形變化唔算豐富，例如 he 喺賓格同與格嘅情況下都係變做 him 嘅樣[註 3]。相比之下，（例如）拉丁文（羅馬帝國嘅官方語言，歐洲史上最有影響力嘅語言之一）就有更加豐富嘅格詞形變化，例如係 rēx 呢隻拉丁文嘅詞噉，隻詞係名詞國王或者王者噉解，可以基於格同埋數量嚟做變化[8]:p. 22：

More information 格, 單數 ...

噉，考慮吓以下呢啲拉丁文短語嘅粵譯：

  1. rēx videt → 「國王睇到...」
  2. rēgem videt → 「睇到國王...」

－兩句嘢都係「表示國王嗰隻詞行先，表示睇到嗰隻詞（videt）行後」。兩句嘢嘅分別在於句 1 嘅 rēx 係主格，而句 2 嘅 rēgem 係賓格，所以句 1 嘅「國王」係句子嘅主，係做出「睇到」呢樣動作嗰一方，而句 2 嘅「國王」係句子嘅賓，係「睇到」呢一樣動作嘅對象（或者受體）。

額外資訊：芬蘭-烏戈爾語族嘅文法格

芬蘭-烏戈爾語族[歐 4]係烏拉語系嘅語族，唔屬於印歐語言。呢個語族散佈喺東歐同周圍嘅某啲地區，比較出名嘅成員有匈牙利話、芬蘭話同愛沙尼亞話等等。雖然佢哋唔屬印歐語言，但佢哋歷史上同歐洲嘅眾印歐語言有緊密嘅接觸，因而有唔少特性似歐洲嘅印歐語言。

芬蘭-烏戈爾語族喺文法格方面幾唔尋常。首先，佢哋有極豐富嘅文法格，例如芬蘭話嘅名詞有 15 隻文法格[9][註 4]，而匈牙利話嘅名詞就有 18 隻格[10]。匈牙利文另外唔同嘅係唔用屬格表示擁有，而係被擁有嗰樣嘢變格[註 5]：

  • 英文用屬格嘅話，係喺擁有者嘅名詞度加後綴－例如 John 指阿莊，而 John's 指阿莊嘅...－擁有者嗰隻名詞後面加咗 's 呢橛後綴，
  • 匈牙利文就會喺被擁有嗰樣嘢度加後綴－例如 alma 係指蘋果，而 Péter almája 係指彼得個蘋果－留意到，為咗表示「擁有」而變樣嘅，係 alma（蘋果）唔係 Péter（彼得）。
Remove ads

格嘅標記

睇埋：標記詞同話題優先語言

有唔少語言都會用標記詞[歐 5]嚟嘜maak1低「呢隻呢隻詞屬邊款文法格」。首先，可以想像以下呢啲粵語句子[11][12]:1.3：

More information ... 將..., ... 呢，... ...

喺 1 嗰行橫行「魚蛋」嘅例句當中，兩句句子都係成 [名詞-名詞-動詞] 噉嘅基本結構，當中一句係我行先，另外嗰句係粒魚蛋行先，但喺廿一世紀初嘅粵語入面，兩者都成功表達到「食嘢嘅係我，被食嘅係粒魚蛋」噉嘅意思。淨低啲例句都係同一道理。噉係因為將同呢扮演咗標記詞噉嘅作用－根據粵語嘅慣例[11]，

  • 如果一句句子成 [名詞 1 / 將 / 名詞 2 / 動詞] 噉嘅結構，名詞 1 係主語而名詞 2 係賓語；而
  • 如果一句句子成 [名詞 1 / 呢， / 名詞 2 / 動詞] 噉嘅結構，名詞 2 係主語而名詞 1 係賓語；

所以聽或者睇句子嘅人，能夠輕易噉得知邊隻詞係主語邊隻詞係賓語。好似「將」同「呢，」噉「掕住隻詞，表示嗰隻詞嘅文法功能係乜」嘅形態素，就係所謂嘅標記詞[13]。

日韓標法

睇埋：主題標記

雖然上面用咗粵語做例子，但會用標記詞嘅語言，遠遠唔淨只有粵語，好似係客家話[14]、標準官話、韓國話、日本話同南美洲嘅奇楚華話... 等嘅好多語言，都有用到標記詞或者類似標記詞噉嘅嘢。例如睇吓日本話噉，廿一世紀初嘅日本話有三大重要嘅標記詞，wa（は－主題標記）、ga（が－主語標記）同 o（を－賓語標記），睇以下幾句例句：

車 は 新しい です 。 （粵譯：架車好新。）
Kuruma wa atarashii desu
Topic-S
名詞 主題標記 形容詞 動詞
（架）汽車 新 係...（現在式）
今日 は 学校 に 行きます 。 （粵譯：今日去學校。）
Kyou wa gakkou ni ikimasu
Topic IO V
名詞 主題標記 名詞 marker 動詞
今日 學校 前往（現在式）
テレビ は 子供 が 見ます 。 （粵譯：細路睇電視。 / 至於電視呢，細路睇緊。）
Telebi wa kodomo ga mimasu
Topic-O S V
名詞 主題標記 名詞 marker 動詞
電視 細路 睇（現在式）
－句解：
  • 句 1 可以理解做「就架車（wa）呢個主題，我想講嘅係（架車）好新」噉嘅意思，
  • 句 2 可以理解做「就今日（wa）呢個主題，我想講嘅係會前往學校」。
  • 句 3 清楚噉表示緊「睇嘢嘅係細路，被睇嘅係電視」噉嘅意思－ga 表示咗細路係主語，不過（簡單噉講）講嘢嘅人想強調電視（wa）呢個主題，所以將身為賓語嘅電視擺喺句子最頭[15][16]。亦可以睇返上面講到，粵語可以用 [O / 呢， / S / 動詞]（OSV 型）噉嘅句子，用嚟強調賓語嘅內容。

順帶一提，韓國話同日本話喺呢方面幾相似，但係依然有差異[註 6]：首先，喺嘜主語嗰陣，日本話係用 ga 嚟嘜，而韓國話就係用 ka 嘅[17]，不過思考吓以下嘅句子[18]:11.1：

Kodomo ni eigo ga wakaru （日本話）
細路 英文 （能夠）理解（現在式）
Ai ka yenge lu ihayha-nta （韓國話）
細路 英文 （能夠）理解（現在式）
－兩句嘢都係表達「細路能夠理解英文」噉嘅意思，留意日本話係用標主語用嘅詞（ga）嚟標 eigo（英文）嘅，同時韓國話套標法唔同，韓國話唔係用標主語用嘅詞（ka）嚟標 yenge（英文）嘅，隻 ka 標咗喺 ai（細路）嗰度。
Remove ads

語言類型

内文：語言類型學
睇埋：基本語序

淨係睇返上面講到嘅內容。有一樣好明顯嘅事實係，唔同語言會用唔同方法處理文法格。

  • 英文：嚴格噉跟 SVO 句法－英文近乎冇格詞形變化咁滯，詞唔會變樣嚟表達佢係邊一個格，亦冇標記詞；喺絕大多數情況下，英文啲句子都要係 S 行先、跟住出 V、最後先出 O，完全齋靠啲詞嘅次序嚟表達「邊隻係 S 邊隻係 O」嘅資訊[19]。
  • 好多歐洲語言：有顯著嘅格詞形變化，例子可以睇返頭先提咗嘅拉丁文；不過就算淨係集中睇呢啲「有明顯格詞形變化」嘅語言，依然可以留意到佢哋之間有唔少差異；例如德文都有格詞形變化，不過佢哋淨係得 NOM / ACC / DAT / GEN 呢 4 格，少過拉丁文嘅 6 格[20]。俄羅斯話同拉丁文都係 6 格，但俄羅斯話嗰 6 格係 NOM / ACC / DAT / GEN / INT / PREP [21]。
  • 好多東方語言：成日會用標記詞；粵語同標準官話典型句子係 SVO 型，唔用呢種標準句法嗰陣就會出標記詞；日本話同韓國話就係典型句子會有標記詞。

語言學家深入噉剖析咗好多唔同語言嘅文法格，想睇吓有冇得靠「點樣處理文法格」嚟將語言分類。

五大配列

内文：詞句配列

睇埋：及物、雙及物動詞同論元

詞句配列[歐 6]係廿一世紀初語言類型學上嘅一個重要概念。

首先，以下討論嘅嘢會用到 3 個符號：S、A 同 P，當中[18]:11.1[22]

  • S（Sole argument，英文唯一論元噉解；簡寫 S [註 7]），又叫自動詞節，表示一隻不及物動詞嘅唯一論元，例：明仔打乞嗤，打乞嗤係不及物嘅動詞，而明仔係隻動詞嘅 S；
  • A（Agent；做出舉動嗰方）同 P（Patient；承受舉動嗰方），又叫他動詞節，分別表示一隻及物動詞嘅兩隻論元，例：米高識講廣東話，識講係及物動詞短語，米高係 A 而廣東話係 P。

諗返日本話嗰個例子，日本話嘅做法係「S 同 A 處理方法相同，但 P 嘅處理方法同前兩者唔同」嘅－上面講咗，日本話會用 ga 嚟嘜 S 同 A，而 P 就會用 o 嚟嘜。因為噉，日本話就算係所謂嘅對格型配列。而根據呢套噉嘅邏輯嚟諗嘅話，語言就首先可以分 5 大類。呢套分法就係所謂嘅詞句配列[18]:11.2：

S 同 A 用同一方法處理，P 當做另一類嘢。→ 對格型[歐 7]，S = A ≠ P
S 同 P 用同一方法處理，A 當做另一類嘢。→ 能格型[歐 8]，S = P ≠ A
A 同 P 用同一方法處理，S 當做另一類嘢。→ 二種斜格型[歐 9]，A = P ≠ S
S A P 都用唔同方法處理。→ 三立型[歐 10]，S ≠ A ≠ P
S A P 都用同樣方法處理。→ 中立型[歐 11]，S = A = P
活格型係種比較進階嘅類型，再下面會詳細啲噉講。
Thumb

喺呢種分類法下[註 8]：

  • 世上大多數（有估計話係超過 65% [18]:11.4）語言都屬於對格型，包括英文、法文、俄羅斯話、日本話同拉丁文噉。拉丁文例句：
Puer labora-t
（個）男仔（NOM） 做嘢
→ 粵譯：「個男仔喺度做嘢。」
Puer magistr-um percuti-t
男仔（NOM） 老師（ACC） 郁手打
→ 粵譯：「個男仔郁手打老師。」
  • 留意到無論個男仔（puer）係 S 定 A 都好，隻詞都當正咗係屬同一格噉。
Pirata-∅ abiatzen da
（個）海盜（ABS） 離開
→ 粵譯：「個海盜離開。」
Medikua-k pirata-∅ beldurtzen du
（個）醫生（ERG） 海盜（ABS） 嚇親
→ 粵譯：「個醫生嚇親個海盜。」
  • 留意到喺兩句嘢當中，海盜都用 -∅ 嘜實咗（-∅ 指唔加嘢），但海盜喺例句 1 入面係 S 而喺例句 2 入面係 P（S + P = 通格；ABS），同時例句 2 入面身為 A（作格；ERG）嘅醫生用咗隻唔同嘅詞（-k）嚟嘜住。
  • 二重斜格型、三立型同中立型極之少有。喺廿一世紀初，淨係得某啲極少人講（母語使用者數量得嗰幾千至萬零）、多數人聽都未聽過嘅語言被指有呢啲類型嘅傾向，例子可以睇吓伊朗乳山話（根據 1990 年嘅估計，得大約 18,000 位母語使用者）被指有二重斜格型嘅傾向[25]。有觀點主張，對格型同能格型之所以咁常見，係因為格嘅使用重點在於要幫聽或者睇語言嘅人分辨 A 同 P 邊個打邊個，而 5 大基本配列當中，得對格型同能格型算係有效率噉做到呢一點[23][26]－
    • 如果一隻語言用二重斜格型或者中立型，聽或者讀嘅人就成日都焗住要靠自己嘅常識判斷「邊隻詞係 A 邊隻詞係 P」，
    • 三立型缺乏效率，因為定義上 S 唔會同 A 或者 P 喺同一隻動詞度出現，所以一隻語言冇必要好似三立型噉分開嗮 3 嚿嘢嘅嘜法。

分裂能格型

内文：分裂能格型

不過事實表明咗，語言嘅文法格處理方法遠遠唔淨只得上述 5 種咁簡單。

分裂能格型[歐 12]：指一隻語言會用對格型做法又會用能格型做法。舉個實際例子嘅話，可以睇吓格魯吉亞話（高加索地區國家格魯吉亞嘅官方語言）－廿一世紀初嘅格魯吉亞話，喺詞句配列上出咗名有樣幾唔尋常嘅特徵，就係會視乎時態嚟揀用邊隻詞句配列，句嘢係現在式嗰時會用對格型，過去式嗰時就用能格型[27]，可以睇睇以下嘅例句[18]:11.3.1：

student-i midis
（個）學生（NOM） 去（現在式）
→ 粵譯：「個學生去（某啲地方）。」
student-i ceril-s cers
（個）學生（NOM） 信（ACC） 寫（現在式）
→ 粵譯：「個學生（喺度）寫封信。」

留意 -i 嘜住咗 student－student 喺句 1 係 S 而喺句 2 係 A，同時句 2 用 -s 嘜住 ceril（P）。所以格魯吉亞話喺呢度似對格型語言。

student-i mivida
（個）學生（ABS） 去（過去式）
→ 粵譯：「個學生去（咗某啲地方）。」
student-ma ceril-i dacera
（個）學生（ERG） 信（ABS） 寫（過在式）
→ 粵譯：「個學生寫（咗）嗰封信。」

留意 -i 喺句 1 嘜住嘅係身為 S 嘅 student，喺句 2 -i 嘜住嘅係身為 P 嘅 ceril，同時句 2 用 -ma 嘜住 student（A）。所以格魯吉亞話喺呢度似能格型語言。

活格型配列

内文：活格型配列
睇埋：有生定無生

活格型[歐 13]（SA = A ≠ SP = P）：指一隻語言「點嘜 S 嘅格」要睇隻動詞嘅語義屬咩類型，又或者係 S 點樣嘜法會表達到某啲意思。例如高加索地區嗰頭有啲語言用親唔及物嘅動詞嗰陣，都可以有兩種嘜法。用粵語噉嘅方法想像嘅話，可以睇以下嘅句子，兩句嘢都用咗同一隻唔及物嘅動詞，當中個 S 係我哋[18]:11.3.2：

我哋（P 式嘜法） 跌低（咗）
我哋（A 式嘜法） 跌低（咗）

呢兩句嘢都會畀人覺得佢哋啱文法，不過意思上會有啲唔同（S 嘅嘜法會表達緊某啲意思）－句 1 將 S 嘜做 P，用意在於表示「S 無意做出動詞指嗰樣動作」，而句 2 將 S 嘜做 A，用意在於表示「S 有意做出動詞指嗰樣動作」；噉即係話句 1 會帶有一個唔小心跌低咗噉嘅含意，而句 2 會帶有特登跌低噉嘅含意。

Remove ads

睇埋

文獻

  • Clackson, J. (2007). Indo-European linguistics: an introduction. Cambridge University Press.
  • Næss, Å. (2007). Prototypical transitivity. Prototypical Transitivity, 1-253，對於「點解世上絕大多數語言都係對格型或者能格型」，又有種觀點主張（簡化噉講）「S 喺語義上有陣時似 A 有陣似 P，所以人有種傾向會將 S 嘜做 A 或者 P 噉嘅樣」。

註釋

  1. [1]
    芬蘭話同巴斯克話唔係印歐語言。
  2. [2]
    類似英文嗰種喺某啲名詞短語後面加 -'s（名詞變樣）表示從屬關係嘅做法。
  3. [3]
    順帶一提，斜格（oblique）可以泛指任何「主語以外嘅嘢」嘅格，而好似英文嗰種「將賓格同與格當做同一格」嘅做法，會將呢兩隻格統稱做斜格。
  4. [4]
    賓格有啲人唔計係獨立嘅格，唔計賓格 14 個格
  5. [5]
    呢點似聖經希伯來文。
  6. [6]
    可以睇埋阿勒泰語言嘅概念。
  7. [7]
    唔好同表示主語嗰隻 S 撈亂。以下講詞句配列嗰陣用嘅 S 一律係指「不及物動詞嘅唯一論元」而唔係指主語。
  8. [8]
    語言呢家嘢，好多時冇乜定死咗嘅規則。話一隻語言「屬對格型」，意思係話呢隻語言大多數情況下都會跟對格型噉嘅規律。

引述

拎

Loading related searches...

Wikiwand - on

Seamless Wikipedia browsing. On steroids.

Remove ads
Remove ads