文獻綜述

文獻綜述（粵音：man4 hin3 zung3 seot6），又有叫文獻探討，係做研究或者寫學術文必要嘅一個步驟，指做嗰個人將有關自己做緊嗰個課題嘅文獻睇勻佢，用意係想確保自己對個課題有充分嘅認識。

有人喺度做研究，一路睇咗大量嘅文獻。

一般嚟講，研究者展開新研究之前，會先翻查同閱讀相關領域最近期嘅學術文獻，目的係了解同行近年做咗啲乜、新出現咗啲乜嘢發現或者理論。咁做除咗可以搵靈感之外，亦可以避免重複咗人哋已經研究過嘅課題。到咗寫文或者進行學術討論嗰陣，研究者通常會先簡單介紹一下個研究領域，列出主要理論同研究方向，再指出現有研究入面存在嘅盲點或者限制，亦即係新研究嘅切入位。舉例講，進行新研究嘅常見原因包括係現有理論無法解釋某啲現象，或者過往研究用嘅量度方法唔夠準確等^[1]。

綜述文

内文：綜述文

綜述文係學術寫作中嘅常見文類，主要目的唔係引入新嘅研究結果，而係總結同整理已有研究。可以分為幾種主要類型，包括敘述型綜述、系統綜述、範圍綜述同埋元分析。研究者需要根據研究目的，選擇適合嘅綜述方法^[2]。

敘述型綜述最簡單，重點在於用文字敘述方式介紹某一主題下已發表嘅資料，常用嚟概括現況或指出未來研究方向。不過由於未必系統性分析方法同文獻選擇，易受作者主觀偏見影響，亦可能忽略理論同方法嘅細節。

系統綜述相對更嚴謹，有清晰嘅 protocol（研究計劃），會交代搜尋策略、選文標準、數據分析方式等，通常由團隊合作完成。系統綜述講求透明、公正，適合用嚟回答清晰嘅研究問題，例如「某種治療方法是否有效」等。

範圍綜述則着重描述某個領域文獻整體面貌，包括重要概念、定義同研究問題，未必針對特定假設，適合用於新興領域，為系統綜述鋪路。

元分析則屬統計導向，將多項定量研究結果統整，分析統計效應量之間嘅整體趨勢，需依循特定方法指引，適合需要綜合量化數據嘅研究者使用。

睇埋

• 研究
• 再現
• 學術文

文獻

• Cooper, Harris M. (1998). Synthesizing Research: A Guide for Literature Reviews. Applied Social Research Methods (3rd ed.). Thousand Oaks, California: SAGE Publications. ISBN 978-0761913481.
• Creswell, John W. (2013). "Review of the Literature". Research Design. Qualitative, Quantitative, and Mixed Method Approaches (4th ed.). Thousand Oaks, California: SAGE Publications. ISBN 9781452226101.