曹芳

曹芳（粵拼：cou4 fong1；232年—274年），字蘭卿（laan4 hing1），係三國時第三位魏國皇帝，曹叡嘅便宜仔^[1]。

239年1月，魏明帝曹叡過身，之後由曹芳繼位。曹芳在位嗰時並冇實權，朝廷俾大臣司馬懿同埋曹爽控制^[2]。249年，曹爽喺政治鬥爭入面輸畀司馬懿，朝廷就咁樣俾司馬懿控制咗^[3]。251年司馬懿死咗之後，佢個仔司馬師繼續控制朝廷^[4]。曹芳諗住搶返啲權力，於是搵咗夏侯玄、張緝同埋李豐三個大臣一齊傾計劃，佢哋計劃由夏侯玄嚟做大將軍。點知件事俾司馬師知道咗，夏侯玄等人俾處死^[5]。254年，曹芳自己亦都俾司馬師迫落台，廢為齊王^[6]。之後司馬師另立曹髦做魏國皇帝。西晉建立之後，司馬炎貶曹芳做邵陵縣公。274年，曹芳逝世，享年43歲^[7]。