本體 (資訊科學)

本體（英文：ontology）係一種知識表示方法^[1]：一個本體會用類似附圖噉嘅做法，包含大柞概念（幅附圖包括咗哺乳動物、鯨魚、同水等等），指明嗮每一對概念之間嘅關係－鯨魚「屬於」哺乳動物、鯨魚「住喺」水入面、哺乳動物「屬於」動物... 等等。本體式嘅知識表示法喺好多實用領域上都有用，例如係喺臨床醫學上幫手做決定^[2]、知識發現^[3]、同埋好多其他方面^[4]。於是學界發展咗網絡本體語言（Web Ontology Language）呢款程式語言專門攞嚟整本體^[5]。

一個語義網絡表達概念之間嘅關係（英文）。

製作

睇埋：邏輯編程

以下呢段係一段用網絡本體語言表達嘅一個本體，用嚟描述一啲有關意大利薄餅嘅知識^[1]：

Namespace(p = <http://example.com/pizzas.owl#>)
Ontology( <http://example.com/pizzas.owl#>
   Class(p:Pizza partial
     restriction(p:hasBase someValuesFrom(p:PizzaBase)))
   DisjointClasses(p:Pizza p:PizzaBase)
   Class(p:NonVegetarianPizza complete
     intersectionOf(p:Pizza complementOf(p:VegetarianPizza)))
   ObjectProperty(p:isIngredientOf Transitive
     inverseOf(p:hasIngredient))
)

舉個例子說明，呢段碼 ObjectProperty 嗰行會同個程式指明個本體入面某啲物件嘅特性，呢行指令講咗幾樣嘢：首先，「係某某嘅原料」（isIngredientOf）呢個關係係有遞移性嘅（Transitive）－即係教部電腦，如果 A 係 B 嘅原料而 B 係 C 嘅原料，噉佢可以推斷 A 係 C 嘅原料；呢行指令仲表明咗「係某某嘅原料」係「原料包含咗」（hasIngredient）嘅反轉（inverse）－所以運用呢個本體嘅人工智能程式可以做（例如）「夏威夷薄餅原料包含咗菠蘿，所以菠蘿係夏威夷薄餅嘅原料」嘅推理。

睇埋

• 語義網絡可以算係本體嘅一種。
• 本體學習