板塊構造

板塊構造係個科學理論，論地殼並唔係一塊不變，而係由好多板塊組成，互相移位，解釋到點解有地震、山脈、洋脊、海溝呢啲自然地貌。地殼下嘅溶岩對流，會推動版塊。

地球板塊

個理論唔單止用喺地球，其他類似行星，都用得到。

地球

地球嘅板塊構造

板塊個名	板塊嘅面積 106 km2
太平洋板塊	103.3
非洲板塊	78.0
北美洲板塊	75.9
歐亞大陸板塊	67.8
南極洲板塊	60.9
印度-澳洲板塊	47.2
南美洲板塊	43.6

睇埋：大陸

喺地球外層嚟嘅剛性岩石圈分做好幾塊板塊^[1]。目前地球嘅主要板塊有太平洋板塊、北美洲板塊、歐亞大陸板塊、非洲板塊、南極洲板塊、印度-澳洲板塊、同南美洲板塊呢啲。另外仲有阿拉伯板塊、加勒比板塊、喺南美洲西海岸對出嘅納斯卡板塊、同埋喺南大西洋嘅斯科舍板塊呀噉。呢啲板塊係硬淨嘅，喺軟流圈上面浮吓浮吓^[2]，仲識慢慢噉郁－板塊之間會有相對運動，而呢啲郁動分做三種：一係聚合板塊邊緣（Convergent plate boundary）－指兩塊板塊互相靠近；二係分離板塊邊緣（Divergent boundary）－指兩塊板塊分離；三係轉形斷層（Transform fault）－指板塊之間互相橫向噉郁。因為呢啲地殼活動，搞到喺呢啲板塊嘅邊緣上面會容易有地震、火山活動、造山運動、同埋形成海溝，好似係日本列島同台灣就係坐正喺板塊邊緣上面嘅地方，間唔鐘就會有地震。唔同嘅板塊郁嘅速率仲會唔同：喺呢啲板塊當中，大洋板塊郁得快啲，而大陸嘅板塊郁得慢啲，好似係屬於大洋板塊嘅科科斯板塊位移嘅速率係每年 75 毫米^[3]，而太平洋板塊就以每年 52 至 69 毫米嘅速率位移；屬於大陸板塊嘅歐亞大陸板塊，平均以得每年大約 21 毫米嘅速率行進^[4]。

隨住板塊嘅飄移，海入面嘅岩石會跌落去聚合板塊邊緣嘅前緣下方，同時地幔嘅物質會喺分離板塊邊緣做成嘅空間嗰度上升。呢啲過程令到海洋地殼一邊係噉產生跟住又俾佢回收返落地幔嗰度，所以海洋地殼嘅岩石更新得好密。因為噉，海洋地殼多數好後生，低過 1 億歲。而家最古老嘅海洋地殼喺西太平洋地區，估計大約係得 2 億歲^[5]。相比之下，最古老嘅大陸地殼年齡有成 40.3 億歲^[6]。