海報環節

海報環節^{[註 1]}，又叫海報演示^{[註 2][1]}、海報滙報^[2]、海報發表^[3]或者海報交流^[4]，係指學術研討會或者類似活動之中，專門俾學者親自解釋自己嗰張研究海報嘅時段，在場嘅其他學者可以即場問問題。研討會可以有一個或者多過一個海報環節。

海報環節畀學者親自解釋張海報嘅時間，在場嘅其他學者可以即場問問題

海報環節係一種帶有互動性嘅匯報學術成果嘅渠道，研究生或者新晉學者成日都會爭取機會，想喺海報環節嗰度匯報自己嘅研究，籍此識多啲人、練習點樣向人解釋研究結果... 等等^[5]。

要參與海報環節，研究者通常要首先向搞研討會嘅組織提交摘要，跟住個組織要審批份摘要，檢視佢係咪有足夠價值。有陣時，呢個過程入便可能包埋同儕互評，符合學術期刊發表嘅資格。評審人員揀好，就會通知投稿嘅人話俾佢哋知佢哋有冇被選中。

設計

呢幅相右邊嗰個人喺度向其他人講解自己份研究，一路喺度指返自己張海報。

睇埋：平面設計同視覺分級

研究海報嘅設計，好多時要做到用視覺化嘅方式快速提供資訊俾行過嘅人。以下係一啲較多人講嘅技巧^[6][7]：

• 清晰層次：標題要大而簡潔；用小節標題（如研究背景、方法、結果、結論）劃分二到四欄，等讀者可以輕易於由左至右、由上而下閱讀^{[註 3]}，跟從所謂嘅 Z 字形眼郁動。
• 精簡文字：以要點代替長嘅段落；每段唔多過三到四行，避免細字密排。
• 圖像優先：用高解像度嘅統計圖同相；圖例、座標、單位標示要齊全；顏色對比足夠以保障可讀度。
• 一致風格：整體配色、字體、行距同留白要前後一致；避免過多裝飾元素分散注意力。
• 實用資訊：於標題附近列出作者、所屬機構、聯絡電郵；可加 QR 碼連結論文全文或者數據集。
• 尺寸規格：要遵守主辦方要求，並預留少少邊位方便貼喺第啲海報隔籬。

匯報

睇埋：個人品牌

參加海報環節，仲會講求口才，參加者唔單只要做到幅海報吸引到人，仲要向人講解自己嘅研究，尤其係呢啲研究對人類知識作出咗咩貢獻。以下呢啲都係常見嘅匯報技巧^[8]：

• 開場稿：佢哋好多時要準備 30 秒同 1 分鐘版本，自我介紹，加埋研究問題、最重要發現係乜同埋呢啲發現有咩意義噉。
• 互動導向：可以首先問對方嘅背景或有咩興趣，再按需要調整深度；鼓勵對方提問，適當嘅時候用筆示範海報重點。
• 語言精準：用簡潔專業術語配合通俗解說；避免讀稿式逐字重述海報全文。
• 時間管理：高峰時段以概要為主；如果對方想深入，提供資料連結或約後續交流。
• 收集反饋：記錄常見問題、建議同潛在合作；準備咭片或聯絡方法。
• 儀態與佈局：企嘅姿勢要自然、目光接觸、音量適中；現場備有簡短手冊或圖例打印件以備派發。

睇埋

• 研討會
• 學術文

註

1. 英文：poster session
2. 英文：poster presentation
3. 用廿一世紀初歐文同中文寫嘅學報，通常係左至右上至下嘅，不過某啲語言嘅文字系統唔係噉。