準確同精確

準確度（參見英文：accuracy）同精確度（參見英文：precision），當中精確度喺粵港中文又叫精密度，係用嚟衡量觀察誤差嘅指標。喺嚴格嘅科學用詞裡便，準確度講嘅係一組量度數值有幾接近真實值，而精密度就講緊呢啲量度數值之間互相有幾接近^[1]。

基本概論

睇埋：量度同量化

例如喺神經科學研究，研究人員可能會用功能性磁振造影（fMRI）等嘅神經造影技術，量度個腦對特定嘅刺激（例如某一段語音）有咩反應。若果每次掃個腦嗰陣得出嘅訊號都差唔多，但係整體上偏離咗該腦區嘅實際活動水平，噉就屬於精密但唔準確；相對嚟講，如果量度結果嘅平均值好接近真實嘅活動水平，但每次結果之間爭好遠（可能受雜訊干擾），就係準確但唔精密。最理想情況，係份研究做到兩者兼備：多次量度之間結果接近，而且接近真實值，同時具備高準確度同埋高精密度。

又例如經濟學研究，量度某個國家、省或地區嘅通脹率。假設馬來西亞使用多種方法去估算佢哋嘅通脹率（例如用消費者物價指數等），如果各種方法去估算，出嘅值都差唔多，但實際上低估咗物價升幅，噉就係精密但唔準確。相反，如果估算出嚟嘅通脹率平均好接近真實升幅，但唔同方法得出嘅數字波動好大，就屬於準確但唔精密。喺宏觀經濟學嘅決策中，若果準確度或精密度不足，可能會導致政府作出錯誤嘅政策選擇。

例如想像下圖個參照值係研究者想量度嘅數值，而曲線反映量度到嘅值（可以睇睇概率分佈）：

ISO 定義

根據 ISO 5725-1 嘅定義：^[2]，準確度呢個概念用嚟描述某次量度同真實值之間有幾接近。用呢個詞嚟講多次量度同一個被測量量^[3]嘅結果嘅時候，準確度同時涉及兩方面嘅誤差：隨機誤差同系統誤差。喺呢個情況下，真確度^[4]係指一組量度結果嘅平均值有幾接近實際（真實）值，即係反映系統誤差；而精密度就係指呢組結果之間互相有幾接近，反映緊隨機誤差。

根據 BIPM 同 ISO 5725 嘅標準，靶向分佈（射擊）嘅準確度圖示：

準確度低，因為精密度低 準確度低，因為精密度低  精密度高，但係準確度低 精密度高，但係準確度低

睇埋

• 靈敏同特異
• 信度同效度
• 顯著差異
• 概率分佈