粗獷主義

粗獷主義（英文：Brutalism，又叫蠻橫主義或粗野主義）係建築流派嘅一種，可以歸入現代主義入面。主要喺1953至1967年之間流行，由功能主義發展而來。

聖地牙哥加州大學圖書館

佢嘅建築特色係不修邊幅嘅鋼筋混凝土或者其他材料嘅毛糙、沉重同粗野感。

歷史

呢個詞最早係由瑞典建築師漢斯·阿斯普隆德（Hans Asplund）用嘅，用嚟描述烏普薩拉嘅建築物「Villa Göth」（1950年起好）。當時佢係用瑞典文「nybrutalism」（新粗獷主義），後嚟米高·范翠斯等等嘅英格蘭建築物都用呢一個名，個概念去到英國嘅史密森夫婦（Alison & Peter Smithson）手上有進一步嘅發展^[1][2]。建築評論家雷納·班海姆喺1966年出版《The New Brutalism: Ethic or Aesthetic?》，令 Brutalism 這個字開始傳開去。^[2]

勒·柯比意係粗獷主義嘅代表人物，代表作包括馬賽公寓同印度昌迪加爾法院。呢啲建築物用當時好少見嘅混凝土預制皮直接相接，無任何修飾，預制板無打磨，甚至連安裝模板嘅痕跡都仲喺到。

受「粗獷主義」影響嘅仲有英國嘅詹姆士·史特靈爵士（萊漢姆住宅）、美國嘅保羅·魯道夫（耶魯大學建築系館）、美國嘅路易·康（李查醫學研究中心）、德國嘅葛腓烈·般姆、日本嘅前川國男（京都文化會館、東京文化會館）同佢嘅學生丹下健三（山梨縣文化會館）等等。

喺前蘇聯國家，設計呢種建築唔單止係為咗藝術，而係共產黨為咗應付大量建設需求，產生咗一種叫赫魯雪夫樓嘅建築物，成為社會主義地區嘅主要風格。

亞洲例子

• 
  新加坡珍珠苑（英文：Pearl Bank Apartments）（拆咗）
• 
  菲律賓商業銀行和信託公司大樓
• 
  日本國立京都國際會館
• 
  台灣三信家商波浪大樓
• 
  香港中文大學胡忠多媒體圖書館