紅線女

紅線女（粵拼：hung4 sin3 neoi2；1924年12月27號—2013年12月8號），原名鄺健廉（kwong3 gin3 lim4），佢係一位好出名嘅粵劇演員，人稱「女姐」，廣東開平水口鎮泮村人^[1]，廣州西關出世。代表曲《荔枝頌》、《珠江禮讚》、《昭君出塞》係粵劇唱腔經典，並開創咗獨樹一幟嘅紅腔。

紅線女
女演員
原名	鄺健廉
粵拼	hung4sin3neoi2
花名	小燕紅、女姐
出世	(1924-12-27)1924年12月27號 中華民國 廣州
死	2013年12月8號(2013-12-08)（88歲） 中國 廣州
配偶	馬師曾（1944-1955） 華山（1970年代）
仔女	馬鼎盛、紅虹
活躍年代	1940年代至1960年代

藝術生涯

佢阿爺係鬚生聲架南，舅父係武生靚少佳，舅母係花旦何芙蓮^[2]。堂伯父係同治年間創建粵劇行會「八和會館」嘅武生鄺新華^[3]。8歲跟留聲機學唱粵曲。抗日戰爭前，住喺廣州西關^[3]，1938年因日軍侵華而輟學，跟阿媽經澳門去到香港，拜舅母何芙蓮為師，正式成為職業粵劇演員，改藝名「小燕紅」^[4]。1939年春，喺勝壽年劇團第一次登台演出。之後一路做第三花旦，喺夜場扮丫環、宮女等配角。1940年，跟何芙蓮臨時喺靚少鳳嘅金星劇團演出，靚少鳳為佢正式改名做「紅線女」。1941年去到上海演出，年底日軍佔領香港，紅線女搬到靚少鳳屋企，15歲加入馬師曾劇團。1943年喺廣東肇慶演出，喺內地第一次用「紅線女」藝名，成為「師曾劇團」嘅正印花旦。其後不停到抗戰後方巡演，多數演馬派劇，如《苦鳳鶯憐》、《鬥氣姑爺》、《軟皮蛇招郡馬》等。

抗日戰爭勝利後返到香港學京劇三年，後來得到何賢贊助成立「真、善、美粵劇團」^[5]，先後同馬師曾、薛覺先合演《蝴蝶夫人》、《清宮恨史》等劇。1946年喺香港連續一個月每日不停演出粵劇戲目《我為卿狂》轟動全港，遞年以《我為卿狂》為題材拍攝咗第一部電影。1950年代初組建紅星粵劇團，同馬師曾領銜去廣州演現代戲《珠江淚》。1952年演出《一代天驕》、《王昭君》，並且嘗試改編《蝴蝶夫人》同埋莎士比亞劇作為粵劇。

紅線女喺傳統旦角基礎上，融入京腔、崑腔同西洋美聲技法，創造出粵劇唱腔「紅腔」，使粵劇旦角唱腔發展到一個嶄新嘅階段^[6]。

1955年，受周恩來邀請去到中國。1956年參加中國國慶7周年觀禮活動，受周恩來接見，同年年尾參與廣東省粵劇團演出。1957年正式以個人身份加入廣東粵劇團（今廣東粵劇院）。期間拜京劇梅蘭芳為師；請程硯秋設計身段、水袖；請俞振飛指點《桂芝告狀》；請周小燕改進《思凡》嘅唱腔；並且研究將朱傳茗、郭蘭英、王昆等唱腔技巧融入粵劇發聲，先後演出《搜書院》、《昭君出塞》、《苦鳳駕憐》、《打神》、《李香君》、《關漢卿》、《山鄉風雲》等戲，最終完成紅派藝術體系^[7][6]。

文化大革命期間，紅綫女一家受到迫害，被逼離開藝術行業，喺廣州掃街，並且多次被「造反派」剃「陰陽頭」。1967年被下放到廣東英德茶場勞動。

1980年，紅線女同秦中英合作改寫《王昭君》，扭轉悲劇情節成為《昭君公主》，同陳笑風等人合演^[8][9]。1984年喺廣州中山紀念堂舉行粵劇戲曲小調獨唱音樂會，係佢文革後首次登台演出，1988年國慶前夕，紅線女率廣州粵劇團到北京舉行「紅線女專場」；1994年喺北京主演《白燕迎春》。並創辦紅豆粵劇團，培養粵劇接班人^[6]。

2012年5月21號，香港新光戲院重新裝修後，舉行開幕禮，紅線女到香港為佢剪綵，後應邀以一曲《荔枝頌》作賀，全場肅立致敬拍爛手掌^[10]。

2013年12月8號晚上8點40分，紅線女因心肌梗塞喺廣州去世，去世前幾日內重登台演出緊。

藝術作品

紅線女曾參演70幾齣電影，主演近200齣粵劇，包括《關漢卿》（1960年）、《搜書院》（1956年）、《沙家浜》、《李香君》、《刁蠻公主戇駙馬》、《打神》、故事片《慈母淚》、《胭脂虎》（1955年）、《秋》（1953年）、《愛》（1955年）、《山鄉風雲》（1955年）、《我是一個女人》（1955年）、《昭君出塞》、《拾玉鐲》、《人海萬花筒》、喜劇《審死官》、寫實片《天堂春夢》等^[6]。

藝術成就

從1950年代到而今多次獲歷任中國國家領導人接見，其中喺1958年，毛澤東親自寫信畀佢，希望女姐身體力行，努力做「勞動人民嘅牽線女」。佢亦係多屆人大代表，包括全國人大第3到第9屆代表。1990年獲廣東省人民政府通令嘉獎；1992年當選為中國戲劇家協會廣東分會主席；2001年6月15號，紅線女喺美國紐約林肯藝術中心接受「2001年度最傑出藝術家」終身成就獎爾個最高榮譽；2002年1月1號，廣東省人民政府授予紅線女「粵劇藝術傑出貢獻獎」。廣州市政府亦特意喺廣州珠江新城興建紅線女藝術中心，慶祝佢出道60周年，表揚紅綫女對粵劇、電影嘅貢獻。中心喺1998年12月落成。

獎

• 1957年，第6屆世界青年聯歡節東方古典歌曲比賽金質獎章，係第1個攞到爾個獎嘅亞洲人
• 1985年，聯合國亞洲表演藝術協會授予「傑出藝人獎」
• 1985年，聯合國交響樂協會授予表演藝術獎
• 1998年，霍英東成就獎
• 2001年，紐約文化事務部同埋美華藝術協會頒發「粵劇終身成就獎」
• 2001年，廣東省政府頒發「粵劇傑出成就獎」
• 2002年，中華人民共和國國務院文化部頒發首屆「造型和表演藝術創作研究成就獎」
• 2005年，香港浸會大學頒贈榮譽文學博士學位^[11]
• 2009年，首屆「中國戲劇獎·終身成就獎」
• 世界華商基金會世界傑出華人獎^[12]

家庭

1944年同馬師曾結婚，有2仔1女，細仔馬鼎盛，個女紅虹係粵劇花旦，1980年代初被中共稱為「潛逃到台灣」，震驚中外，後作為移民入藉加拿大。紅線女同馬師曾離婚返中國之後曾再婚，最後一個老公係作家華山。

參演電影

1947《我為卿狂》 1947《藕斷絲連》 1947《冤枉相思》 1948《梁山伯，祝英台（上、下集）》 1948《荊棘幽蘭》 1948《刁蠻宮主》 1948《審死官》 1949《卓文君夜訪相如》 1949《拷打紅娘》 1949《夜吊白芙蓉》 1949《小青弔影》 1949《六月飛霜》 1950《烏龍將軍》 1950《豪門蕩婦》 1950《風流貴婦》 1950《野花香》 1950《血海蜂》 1950《人海萬花筒》 1950《宋江怒殺閻婆惜》 1950《鳳嬌投水》 1950《魂斷藍橋》 1950《罪惡鎖鏈（上、下集）》 1950《妬潮》 1950《脂粉豺狼》

1951《孤雛淚》 1951《紅白金龍（上集）》 1951《天堂春夢》 1951《第七奇人》 1951《紅樓新夢》 1951《缸瓦船打老虎》 1951《怪錯有情郎》 1951《明星夢》 1951《粉陣迷龍》 1951《紅白杜鵑花》 1951《紅白金龍（下集大結局）》 1951《五姊妹》 1951《怨婦情歌》 1951《十二金釵戲玉郎》 1951《難為了媽媽》 1951《張君瑞情殺賈寶玉》 1951《人間慈父》 1952《契爺艷史》 1952《賣花女》 1952《新姑緣嫂刼》 1952《龍鳳花燭》 1952《春色滿華堂》 1952《飛來艷福》 1952《玉女凡心》 1952《歌聲淚影（上、下集）》

1952《璧合珠聯》 1952《一丈紅》 1952《良宵花弄月》 1952《姊妹花》 1952《歌女紅玫瑰》 1952《七姐會牛郎》 1952《鸞鳳和鳴》 1952《從心所欲》 1952《夜桃源》 1952《紅運媽姐》 1952《佳偶天成》 1952《紅白牡丹花》 1952《一對胭脂馬》 1952《紅伶歌唱大集會》 1953《客串夫人》 1953《慈母淚》 1953《玉梨魂》 1953《貼錯門神》 1953《檀島佳人》 1953《清歌妙舞樂昇平》 1953《慈善紅伶歌唱大集會》 1953《處處喜相逢》 1954《落花流水》 1954《人隔萬重山》 1954《流水行雲》

1954《雙鳳迎龍》 1954《大地》 1954《家家戶戶》 1954《仙樂飄飄處處聞》 1954《蠻女催粧嫁玉郎》 1954《秋》 1955《鴛鴦譜》 1955《我是一個女人》 1955《富貴似浮雲》 1955《兩地相思》 1955《人道》 1955《愛（續集）》 1955《後窗》 1955《天長地久》 1955《鄉下佬遊埠》 1955《一代名花》 1955《愛》 1955《胭脂虎》 1956《桃花依舊笑春風》 1956《原野》 1956《西廂記》 1956《火》 1957《搜書院》 1959《彩蝶雙飛》 1960《佳偶天成》 1961《關漢卿》 1961《香江花月夜》 1961《星月爭輝》 1962《心心相印》 1974《沙家浜》 1990《李香君》

著作

• 《紅線女日記》紅線女 著，香港集文出版社1956年8月初版。