伯特蘭·羅素

伯特蘭 亞瑟 威廉 羅素，羅素伯爵三世（Bertrand Arthur William Russell, 3rd Earl Russell，1872年5月18號—1970年2月2號），OM，FRS，係個英國哲學家，邏輯學家，數學家，歷史學家，社會評論家^[1]。佢成世人唔同時間，認為自己係一個自由主義、社會主義、和平主義者，佢亦承認，深層次來講，佢全部都唔係^[2]。喺 Monmouthshire 出世，家族係英國顯赫嘅貴族^[3]。

伯特蘭·羅素本人

羅素帶領二十世紀初嘅英國「對抗理想主義」^[4]。羅素同埋佢前輩弗雷格（Gottlob Frege）、佢學生維根斯坦創立分析哲學。亦譽為廿世紀首屈一指嘅邏輯學家^[1]。佢夾埋 A.N.懷特海一齊寫嘅《數學原理》，企圖將數學建基於邏輯學。佢嘅哲學散文 On Denoting 好多人認同係一個「哲學嘅範式」（paradigm of philosophy）^[5]。羅素嘅理論同著作對邏輯學，數學，集合論，語言學，計算機科學，哲學，尤其是語言哲學，認識論，形而上學有相當大嘅影響。

羅素出名反戰，佢反帝國主義^[6][7]，亦因為喺第一次世界大戰嗰時為和平主義而入監^[8]。之後。佢反對希特拉、批評史太林極權主義，又抨擊美國介入越戰，重支持裁減核武^[9]。1950年，羅素獲諾貝爾文學獎，嚟「表揚佢多變同重要著作之中，宣揚人道主義嘅理想同埋思想嘅自由」^[10]。