美國財政部

美國財政部（英文：United States Department of the Treasury）喺1789年成立，係美國聯邦政府嘅國庫同埋負責財政嘅部門^[1]。呢個部門負責監督鑄印局（Bureau of Engraving and Printing）同埋美國造幣廠（U.S. Mint）。呢兩個機構負責印刷美元紙幣同埋鑄造硬幣，而財政部就負責執行國內財政體系嘅貨幣流通。財政部通過國稅局收聯邦稅；管理美國政府嘅債務工具；向銀行同埋儲蓄機構發牌同埋監督佢哋；財政部又會就財政政策問題向立法同埋行政部門提供建議。財政部由財政部長管理，佢係內閣成員。美國財政部長嘅法定職責有限，但就鑄幣同埋貨幣印刷等嘅各種嘢向國務卿提供建議^[2]。呢兩位官員嘅簽名都會出現喺所有聯邦儲備券（Federal Reserve notes；美元紙幣嘅正式叫法）上面^[3]。

美國財政部徽章

美國財政部係喺 1789 年根據國會法案成立，負責管理政府收入^[4]。第一任財政部長係喺1789年9月11號宣誓就職嘅亞歷山大咸美頓（Alexander Hamilton）^[5]。當年嘅佐治華盛頓總統原本想叫賓州參議員羅拔摩利士（Robert Morris）做呢個位，不過摩利士拒絕咗華盛頓嘅提議，同埋建議咸美頓做呢個位^[6]。咸美頓建立咗美國早期嘅金融體系，而且喺當時佢一直係華盛頓政府嘅重要人物^[7]。咸美頓嘅相印喺十美元紙幣正面，而背面就印咗華盛頓特區嘅財政部大廈^[8]。