臺灣獨立運動

臺灣獨立運動，簡稱臺獨，係一種政治理念，目標係將臺灣建立成獨立自主、主權完整、同被國際廣泛承認嘅正常國家，喺各方面擺脫主要來自中國大陸嘅干涉或箝制。建立實質及法理獨立的嘅「臺灣共和國」以取代現有嘅中華民國政府^[1]，或使用台灣現有「中華民國」國號，持續走向永久維持現狀嘅兩個國家狀態（即兩國論或一邊一國），並深化基於臺灣主體性嘅臺灣人認同。台灣內部目前因泛藍陣營同泛綠陣營而對統獨選項重有唔同意見（支持維持現狀嘅比例多過支持台灣獨立、而支持台灣獨立嘅比例又高過唔夠一成嘅支持統一）。

詞義謬誤

「台獨」一詞通常所指嘅，唔對應字面意思。「民國」一早喺度，後來有國共内戰，共產黨打贏，攞到國民黨大部分土地，用嚟立個新國——中華人民共和國，實際上係「大陸獨立」，將原本（勉強可以叫做）統一嘅中國土地分裂成鮮明嘅兩國，民國管住嘅就得返台灣呢個大島同一揸島仔。按正常邏輯講，兩岸統一有兩條路——中共吞曬民國或者相反。今時今日，前者強好多，雙方都認為民國無本事攞返被佔領咗嘅大陸，已經無乜人提「反攻大陸」。所謂嘅台獨，理論上係話民國放棄攞返被中共分裂咗出去嘅中國土地，法律上以後承認中共成功分裂咗中國嘅現狀，實際上「台獨」呢個詞語用起來，寓意極之混亂。中共所指，「兩岸統一」嘅實際意思係比「大陸獨立」再進一步——食埋原有中國政權剩翻嘅所有。

各國立場

中華民國

中華民國國內對台獨反應兩面。藍營人士一般反對台獨，綠營人士一般支持台獨。

中華人民共和國

中共政府長期堅決反對「臺獨」主張，主流趨勢係寄望以和平嘅一國兩制方式納咗台灣，並鼓勵加強兩岸合作交流，不過同時中共政府亦喺《反分裂國家法》講到，如果臺灣獨立，將不惜以戰爭解決整個糾紛^[2][3]。

關於以武力佔據台灣，中國政協兼前軍官王洪光，曾經發表「2020武統台灣」嘅預言，話台灣喺2020年前就會被中共以武力攻佔。呢個預言最終並無實現，反而成為咗一啲香港同台灣網民恥笑揶揄嘅目標言論。^[4][5]

美利堅合眾國

2012年2月，新華社聲稱：美國總統奧巴馬話「美方拒絕任何『台獨』主張」，同以往美國慣用「不支持『台獨』」字眼，用咗「拒絕任何」^[6][7]。但民進黨發言人林俊憲表示，佢哋查過各國媒體報導同白宮網站都無發現美國有咁樣講，對於新華社這段報導嘅真實性有保留，可能係佢哋自己片面「加註」^[8]。而陸委會官員亦表示，目前並冇收到美方對呢個會面嘅完整簡報，而且喺美國白宮發布嘅訊息都唔見奧巴馬有咁樣講^[9]。

美國國會喺研究中華人民共和國／台灣嘅「一個中國政策」報告書度（日期：2007年7月9號）闡述美國嘅立場，仲總結咗五點：

1. 喺1972年、1979年同1982年三個美中聯合公報，美國無明確講明台灣嘅主權地位。
2. 美國「認知」兩岸「一個中國」嘅立場。
3. 美國「無承認」中華人民共和國對台灣嘅主權。
4. 美國「無承認」台灣係主權國家。
5. 美國政策認為「台灣地位未定」。

呢五點喺 2013 年美國國會研究報告度冇變^[10]。

新加坡

1995年9月，新加坡第一任總理李光耀喺「21世紀論壇」入面指出，唔理美國人點諗，台灣都無可能變成一個獨立嘅國家，佢仲預測台灣最終會同中國和平統一。台灣冇可能違背一個統一又經濟強大嘅中國嘅意願嚟行自己嘅路^[11]。

2004年7月，時任新加坡副總理李顯龍訪問台灣，回應中國就指責新加坡嚴重違反咗對一個中國政策嘅承諾，佢哋一向都堅持一個中國政策，反對台灣獨立。其實早喺未同中華人民共和國建交之前，新加坡已經定咗呢個基本立場。第二任總理吳作棟都曾喺由國際戰略研究所（IISS）主辦嘅香格里拉對話上，再次重申咗呢個立場^[12]。

2013年，《李光耀觀天下》書中分析：台灣同大陸統一，只係時間問題，冇任何國家可以阻止。其實台灣喺國際上嘅命運，早喺1943年開羅會議嗰陣，就已經定咗落嚟。^[13]

2024年5月，新加坡總理黃循財喺接受《經濟學人》訪問時強調，台灣同烏克蘭嘅情況本質上唔一樣。烏克蘭係一個主權國家，而大多數國家都奉行「一個中國」政策，新加坡喺處理同中國同台灣嘅關係時，一直都好小心咁去維持一個中國政策嘅一致性。「我哋唔會畀人利用，去支持任何有關台灣獨立嘅主張^[14]。」11月15日，黃循財喺秘魯利馬出席第31屆亞太經合組織（APEC）經濟領袖會議期間，再次表明新加坡清楚而且一貫咁堅持一個中國政策，並且反對台灣獨立^[15]。