花牌

花牌，牌一種，中國傳統手藝，尤其喺香港見到，多數好大塊，又叫大花牌、大型花牌。傳統用竹做支架，亦即竹棚，再添木板、紙、布、銻片，面頭整到五顏六色，紅色圍邊，中間寫大大隻字，內邊外邊銻花裝飾，通常都有十呎高以上，多數喜慶場合用^[1][2]，廟會甚至去到十呎高廿呎闊^[3]，去到百一呎闊，卅四呎高都有。單丁一個有，打孖有，成排都有。一般寫賀乜嘢，送畀邊個，邊個送，邊個贊助咁。現今主要做戲院戲棚同出入口^[4]。

單個花牌

打孖來

成排花牌

水月宮觀音聖誕。用電子燈飾

以往酒樓外牆，會有預制花牌，畀擺酒人，換排大字就得。今下都唔再有。查實喪事都有，不過就變藍白黑調。

今下制作得五間^[1]，單長洲就有兩間，一間紅事，一間白事^[5]。長洲興用細花牌公告，花款同其他地方唔同^[2]。香港地貴無乜地方收藏，亦試過打風冧，香港地愈管愈嚴，生意難做，青黃不接，承傳都有問題^[2]。有啲由戶外轉做室內^[1]。有啲電腦打印，當然無咁好睇。

有啲人會話喜事叫花牌，喪事叫花圈，兩者唔能叫錯^[5]。但實際上又唔一定。另外香港鄉間有類似紥作，叫花炮，但唔似花牌咁固定，畀人投返去好意頭。

香港電臺亦整咗節目講花牌，講埋材料架生^[3]。

史

維基會議借花牌購圖

花牌一直喺香港見到。起源有人話牌樓演化，有人話民間扮宮廷，裝飾吉祥^[2]。材料造型係咁變，至早鮮花，就咁花牌紮作叫花店。鮮花易謝轉紙花。紙花唔耐風雨轉銻花。夜光加鎢絲燈膽，慳電又轉電子燈膽，五顏六色都得。初頭手寫大字，懶寫轉用電腦打印都有，不過無咁貴氣^[6][7]。

二十世紀六十年代，師傅整機動花牌，啲花會郁，用風扇摩打，加齒輪單車鏈等造出來，唐餅舖做招客^[6][7]。

用途

乜都用得，傳統節慶，天后誕、盂蘭勝會、太平清醮有。新舖開張、就職典禮有。祠堂重修、廟宇重修有。長洲自創用花牌做公告，好似出外旅遊、婚訊、尋人咁。舊時喜事，嫁娶賀壽會樹花牌。白事就設喪棚^[6][7]。

造工

花牌背

花牌腳紥作

花牌要好長工夫，要十五二十日。後面木板。咁上板之前，就要畫好晒則，安排飾物，舖排文字。造好晒件，就到現場組裝^[2]。有電力配件，就要搞埋供電^[2]。

花飾其次，文字更重要，一手好字先好睇，電腦字就失色，至好熒光墨兼黑白綑字邊。主題至顯眼，嘉賓同贊助芳名亦要明顯^[2]。中間點擺字，好難一概而論。傳統寫法，直寫必然上到下。橫寫必然右至左。不過有啲新潮定唔知，左至右都有。手寫大字現今罕見，要寫得靚，依個至難請人做^[5]，寫幾隻字會花成日。

中間間位有銻花^[7]，銻紙有色造花。呢個邊工叫彈花或者訂花^[5]，人手做，慢工出細貨。另外會用鋁片造掙角^[3]。

款式

有掂有橫，款式講求對稱^[5]，喜事都用紅布綑邊^[7]。傳統會有一啲元素，不過唔一定做足，構圖亦各有變通。後面講三層花牌點款。

成塊版有龍有鳳，寓意龍鳯呈祥^[2]。

頂會拱起，圓又好，金字又好，多角又好。拱起部份鳳頂^[7]，鳳頭望前，凰尾散開，好似孔雀咁，撐起個頂。咁寓意孔雀開屏，鳳凰展翅，吉祥如意之巔^[2]。鳳底有枕柱^[7]，好似屋條樑畀鳳落腳咁。

左右打棟有龍柱^[7]，龍盤住條柱。柱頂有珠，亦即寶珠^[7]。柱底有圓包^[7]。元朗李炎記有飛龍在天，青龍栩栩如生，空中飛舞，直請申請埋專利^[2]。

一般枕柱下面一橫字叫長^[7]。再下一面一橫單丁字排，四方四方咁，叫四方包^[7]，框邊包花。再下面有短啲嘅長。長兩邊有雲柱^[7]。

到底，下面又有個兜，向下突出，叫做肚兜^[7]，有形容做倒等邊梯形，成個聚寶盤^[2]。肚兜又有啲字，一般會寫埋花牌公司名號同電話咁^[2]。