莫樹聯

莫樹聯，SC，BBS，JP（Johnny Mok）係香港資深大律師，親中派政治人物。

法律事業生涯

莫樹聯喺1986年獲得大律師資格，1992年至1993年間自願註銷認許，去到2006年獲得資深大律師資格^[1]。

作為政府嘅代表律師經驗

喺2012年香港行政長官選舉結果相關嘅選舉呈請，佢係代表梁振英嘅首席律師^[2]。

另外，喺青年新政兩名香港立法會議員宣誓司法覆核一案入面，佢亦係政府嘅代表律師^[3]。當時，公民黨立法會議員郭榮鏗就質疑：莫樹聯身兼基本法委員會（中文：香港特別行政區基本法委員會）委員，可能會參與全國人大常委會就宣誓問題嘅釋法討論，可能會引起利益衝突^[4]。

部分公職

佢曾經先後出任消費者委員會委員、空運牌照局委員同埋中央政策組非全職顧問。而家佢係基本法委員會委員^[2]。

屋企

莫樹聯亞爸做生意，有四個老婆十個仔女。專門向江湖人物傳道嘅中國基督教播道會樂泉堂牧師莫樹堅係莫樹聯嘅亞哥，而香港中文大學醫學院教授莫樹錦就係莫樹聯嘅同父異母細佬。

政治立場

莫樹聯係香港親中派嘅政治人物，支持未經事先諮詢或香港人同意，由北京強行落實嘅《香港國安法》，又曾經話香港人無需爭取人權同自由^[5][6]。喺2014年香港社會討論政改嘅時候，佢亦反對公民提名^[7]，又贊成參選人要取得提委會過半數嘅支持^[8]。

另外，喺2021年3月，北京繞過香港修改香港選舉制度，佢亦曾經大讚呢個決定，雖然國際社會批評眾多，話係民主倒退^[9]，直選議席亦大幅減少，但佢就話北京呢個決定可以令香港嘅民主步伐加速發展^[10]。

選舉經歷

喺2021年9月，佢成為香港特别行政區選舉委員會法律界當然委員^[11]。之後佢喺李家超無提政綱嘅情況下，有份提名李家超參與2022年香港行政長官選舉^[12]。

個人榮譽

• 太平紳士（2013年）^[13][14]
• 銅紫荊星章（2016年）^[15]