處理等級模型

處理等級模型（英文：level of processing model）係認知心理學上有關記憶嘅一個理論模型，核心諗法在於「一個人腦對一樣資訊處理得愈係『深入』，佢就愈能夠記得嗰樣資訊」^[1]。

根據呢個模型，基於發音或者寫法等嘅方法嚟記（即係例如記段字嗰陣記啲字嘅音或者字形）係「膚淺」嘅；相對嚟講，基於語義嘅方法嚟記（記段字嘅意思，以及記嗰段字講嘅內容同自己已有嘅知識成咩關係）就係「深入」嘅，比較能夠製造深刻同持久嘅記憶。呢個諗法經已受到唔少實驗嘅支撐^[2]。