西耶路撒冷

西耶路撒冷 (希伯來文：מַעֲרַב יְרוּשָׁלַיִם，羅馬化：Ma'aráv Yerushaláyim、 阿拉伯文：القدس الغربية，羅馬化：al-Quds al-Ġarbiyyah) 係耶路撒冷喺西面嗰半，同東耶路撒冷加埋一齊就係成個城市。

綠色係東耶路撒冷嘅部分，藍色係西耶路撒冷

歷史

喺1920年代開始，猶太人喺西耶路撒冷成立咗一個早期嘅社區^[1]。

喺聯合國嘅181號決議入面，耶路撒冷本來係會成爲一個獨立嘅城邦^[2]，但係因爲第一次中東戰爭嘅關係而冇實行到。到打完仗之後，以色列實際控制咗西耶路撒冷，而約旦就控制咗東耶路撒冷，包括耶路撒冷古城^[3]。以色列將住喺西耶路撒冷嘅阿拉伯人驅逐出境去東耶路撒冷^[4]，而約旦就對喺東耶路撒冷嘅猶太人同樣咁做，其中有大約1,500位猶太人係嚟自耶路撒冷古城^[5]。

喺1949年1月，以色列政府正式將所有政府部門由特拉維夫搬去西耶路撒冷^[6]，並且喺1950年成立耶路撒冷做首都。政府分咗唔少錢去投資入城市嘅發展，包括起新嘅寫字樓、大學、猶太會堂、同埋以色列議會大樓等等^[4]。

喺1967年嘅六日戰爭期間，以色列控制咗成個西岸地區，包括東耶路撒冷^[4]。到1980年，以色列政府正式吞并咗東耶路撒冷，但係國際社會基本上都沒承認^[3]。

人口

根據一份民調顯示，雖然喺東耶路撒冷嘅阿拉伯人開始越嚟越融入以色列嘅社會^[7][8]，但係東西耶路撒冷之間依然有一定嘅分離^[9]。

爭議

雖然以色列自從1967年一直都實際上控制成個耶路撒冷，但係國際社會一般喺有談判結果之前，都唔會肯承認耶路撒冷做以色列或者巴勒斯坦嘅首都，因爲耶路撒冷嘅地位仍然係以巴衝突嘅主要爭議點之一^[4][10]。

有啲國家亦會選擇承認西耶路撒冷做以色列嘅首都。例如，美國^[11]俄羅斯^[12]、捷克^[13]、同埋澳洲 ^[14]等等，不過澳洲喺幾年之後又撤回返之前嘅決定^[15][16]。

睇埋

• 以巴衝突
• 錫安主義