譚惠珠

譚惠珠，GBM，GBS，CBE，OBE，JP（粵拼：taam4 wai6 zyu1；1945年11月2號—），花名「珠姐」，係現任港區全國人大代表、民建聯黨員同香港基本法委員會委員。香港人，籍貫廣東中山，1980年代試過同時做立法局議員、行政局議員、市政局議員同埋區議員，被稱為「四料議員」。此外，佢重係香港警察散仔會嘅創會會長。

譚惠珠
譚惠珠喺2010年4月18號出席城市論壇
出世	(1945-11-02) 1945年11月2號（79歲） 英屬香港
國籍	中國（香港）
職業	香港特別行政區基本法委員會委員
政黨	勵進會（1985年-1991年） 自民聯（1991年-1997年） 港進聯（1997年-2005年） 民建聯（2005年到依家）

爭議

用職權炒的士牌

1990年7月，《壹週刊》爆出譚惠珠身為交通諮詢委員會主席，竟然有「先達的士公司」嘅股份，間公司專炒的士牌，又未申報利益。由於涉及利益衝突，譚惠珠重向無綫新聞申訴，掀起一場干預新聞自由嘅風波。最後譚被殖民地政府疏遠，1991年，譚惠珠就冇得再做行政局議員、立法局議員同交通諮詢委員會主席。

政壇變色龍

香港殖民地時期，譚惠珠思想比較民主同開明，但係立場傾向港英政府。例如1980年，譚惠珠喺公安法例修訂草擬嘅論壇話，民眾集會只要證明冇動亂嘅可能性，就唔算係非法集會，以放寬公眾表達意見嘅權利，主張限制警權^[1]。但1990年代後，佢就同政敵范徐麗泰一樣投奔親中陣營，好似支持23條立法。更話反對嘅人，唔配做中國公民。

主張審查泛民主派參選權利

2021年3月，中國全國人民代表大會未徵詢過香港市民嘅意見，就通過咗一個『311決定』，引嚟泛民主派同好多西方世界列國嘅批評，形容呢個方案扼殺香港民主。

譚惠珠之後多次強調要「愛國者治港」，又曾經公開話，如果泛民主派要參選，佢哋要交代對愛國者為主體治港嘅睇法，支持成立資格審查委員會篩選泛民主派參選嘅權利，又話香港唔可以以民意治港^[2][3]。

政治立場

佢係香港親中派一員。

選舉及提名經歷

喺2016年，佢有份提名林鄭月娥參與2017年香港行政長官選舉^[4]。

喺2021年9月，佢成為香港特别行政區選舉委員會法律界當然委員^[5]。之後佢喺李家超無提政綱嘅情況下，有份提名李家超參與2022年香港行政長官選舉^[6]。

公職

• 香港島各界聯合會榮譽顧問兼義務法律顧問^[7]
• 香港中華文化總會名譽會長^[8]
• 香港福建婦女協會第三屆榮譽顧問^[9]

個人榮譽

• 香港十大傑出青年（1981年）^[10]
• 非官守太平紳士（1982年^[11]）
• 官佐勳章（O.B.E.）（1985年^[12]）
• 司令勳章（C.B.E.）（1988年^[12]）
• 香港中文大學榮譽法學博士（1989年）^[12]
• 金紫荊星章（1998年）^[13]
• 大紫荊勳章（2013年）^[14]