變格

變格（粵拼：bin3 gaak3 | 英文：declension）係指名詞、代名詞、形容詞、副詞或者冠詞因應特定嘅文法功能而作出嘅詞形變化。

基本概念

内文：文法格

傳統上，印歐語言有以下呢八隻最重要嘅文法格（case），啲例句係用咗粗體嚟標示對應嗰款格嘅字^[1][2]：

格	表示啲乜資訊	粵文例句	英文例句
主格（NOM）	主語	佢孭住佢個仔。	He carries his son on the back.
賓格（ACC）	一隻及物動詞嘅賓語	佢個仔孭住佢。	His son carries him on the back.
與格（DAT）	一隻動詞嘅間接賓語，簡單講係「接受某樣嘢嗰方」	我畀咗本書佢。	I have given the book to him.
離格（ABL）	「被某啲嘢離開」嘅名詞	我喺佢度搶本書返來。	I snatched the book from him.
屬格（GEN）	某樣嘢嘅擁有者或者其他緊密關係[註 1]	我將茶斟落佢隻杯度。	I pour the tea into his cup.
呼格（VOC）	隻名詞係畀人用緊嚟稱呼某人	喂，阿莊，你做緊乜呀？	Hey, John, what are you doing?
方位格（LOC）	隻名詞係某啲時間或者空間上嘅位置	我哋喺麥記食薯條。	We ate chips at McDonald's.
工具格（INT）	隻名詞係畀某啲人攞嚟做工具	佢攞對筷子夾起件燒賣。	He picked up a siu mai with a pair of chopsticks.

拉丁文

英文嘅同格有關嘅詞形變化基本上已經完全消失，只係剩返代名詞有格（例如 he 喺 ACC 同 DAT 嘅情況下變做 him）同勉強仲有屬格（英文嘅 ’s 技術上唔係詞形變化）。相比之下，拉丁文（羅馬帝國嘅官方語言）就有豐富嘅格詞形變化，例如係 rēx－國王或者王者噉解－呢隻字噉，隻字係名詞，可以基於格同埋數量嚟做變化^{[3]:p. 22}：

格	單數	大致粵譯	眾數	大致粵譯
NOM	rēx	（一位）國王	rēgēs	（多位）國王
VOC	rēx	國王陛下！（講嘢嘅人同國王講緊嘢）	rēgēs	眾國王！（講嘢嘅人同班國王講緊嘢）
ACC	rēgem	（一位）國王	rēgēs	（多位）國王
GEN	rēgis	國王（單一）嘅	rēgum	眾國王嘅
DAT	rēgī	（畀）國王	rēgibus	（畀）眾國王
ABL	rēge	（對）國王	rēgibus	（對）眾國王

噉睇吓以下呢啲拉丁文短語嘅粵譯：

1. rēx videt → 「國王睇到...」
2. rēgem videt → 「睇到國王...」

－兩句嘢都係表示「國王」嗰隻字行先，表示「睇到」嗰隻字行後。兩句嘢嘅分別在於句 1 嘅 rēx 係 NOM，而句 2 嘅 rēgem 係 ACC，所以句 1 嘅「國王」係句子嘅 S，係做出「睇到」呢樣動作嗰一方，而句 2 嘅「國王」係句子嘅 O，係「睇到」呢一樣動作嘅對象（或者受體）。

語序影響

睇埋：自由語序

變格可以幫手令一隻語言嘅語序變得比較自由，因為詞形變化理論上已經嘜maak1低咗每隻字扮演乜嘢角色，就算（合理咁）掉亂啲字，意思上都照計會完全一樣。不過，現實未必係咁，例如，喺芬蘭文，啲字可以（合理咁）掉亂少少，但係如果次序掉亂過，擺喺句子前面嘅會係重點，亦即係雖然意思大致一樣，但係其實會有唔同。

例如，拉丁文、古希臘文同梵文都有變格，佢哋嘅語序亦自由過（例如）英文好多。

當然，語序要完全自由係冇可能嘅。

睇埋

• 語序
• 語格
• 動詞變化

註釋

1. 類似英文嗰種喺某啲名詞短語後面加 -'s（名詞變樣）表示從屬關係嘅做法。