農曆新年英文名稱爭議

喺英文，農曆新年一般會被翻譯「Lunar New Year」或者「Chinese New Year」。雖然農曆新年係一個不限於華人或中國人慶祝嘅節日活動^[1]，但有啲中國人就唔認同「Lunar New Year」呢個翻譯，覺得呢個翻譯唔尊重中國。有啲激進愛國，但身處海外生活嘅中國人，甚至會作出毀壞他人財物嘅行為。

另外，喺一啲多元文化國家，又或者喺英文維基百科，｢Lunar New Year｣ 嘅問題係 Lunar 嚴格上指任何陰曆，變咗回曆新年、猶太曆新年等等都係一種 lunar new year，可能係某啲國家當初唔用 ｢Lunar New Year｣ 嘅原因，亦導致咗有啲人就算唔認同 ｢Chinese New Year｣ 嘅叫法都唔想用 ｢Lunar New Year｣。有啲人嘅折衷做法係將農曆新年拆散，用 ｢Chinese New Year｣ 之餘講埋 ｢Korean New Year｣ 同 ｢Vietnamese New Year｣^[2][3]。

事例

• 喺2023年1月，新加坡南洋理工大學因為堅持使用「Lunar New Year」一詞而唔係「Chinese New Year」，結果引來一啲人對校內相關活動展板進行破壞，強行「Lunar」字眼劃掉，改成「Chinese」。南洋理工大學校方之後回應事件，話佢哋有來自唔同國家嘅學生同員工，包括來自中國、韓國同越南，而呢啲國家都有慶祝農曆新年^[4]。
• 韓國誠信女子大學教授徐坰德喺2023年1月19號，喺Facebook發起正名運動，呼籲大家從「Chinese New Year」改用「Lunar New Year」，結果遭到大批中國網友辱罵攻擊^[5]。
• 2023年1月，一名中國人喺網上面求助，話自己喺紐約街頭睇到百貨商場拜年海報上寫著「Lunar New Year」而唔係「Chinese New Year」，當場將海報扯爛洩憤，結果被捕。佢堅持自己無錯，結果引起網上嘩然^[6]。
• 2025年1月，中國茶飲品牌霸王茶姬喺社交平台發文使用「Lunar New Year」指代農曆新年，引發一啲中國網民批評，《大公報》甚至用上半版大新聞攻擊霸王茶姬，話「Lunar New Year不準確」，結果霸王茶姬被逼道歉^[7][8]。

對爭議嘅評論

• 時事評論員黃世澤批評小粉紅周圍喺網上挑機，話農曆新年係中國新年嘅講法完全唔科學兼唔客觀，又呼籲大家拒絕「中國新年」呢個叫法，同埋要拒絕文化帝國主義^[9]。
• 長期研究東南亞社會嘅華裔印尼籍學者廖建裕指，農曆新年似乎已經被中國人賦予咗「國家主義」嘅意涵，呼籲各地華人讓「農曆新年」回到初衷，唔好攞呢個節日嚟強調任何國家或民族認同^[10]。

中國政府做法

喺中國政府發佈嘅新聞稿，其實兩種翻譯方法都有出現，「Chinese」一字亦唔係一定會用上。例如，喺2025年1月，國務院就有幾多中國居民前往中國嘅估算，發表新聞稿，標題就用上「Lunar New Year」^[11]，但係同月一段提及馬來西亞華人慶祝農曆新年嘅官方新聞稿，就用上「Chinese New Year」^[12]。

睇埋

• 中國民族主義