司徒成光斬人案
From Wikipedia, the free encyclopedia
Remove ads
鑽石山荷里活廣場斬人案又叫鑽石山斬人案或荷里活廣場斬人案，係指2023年6月2號喺香港鑽石山荷里活廣場發生嘅殺人案，有一個精神病男人用刀斬死咗兩個佢唔識嘅女人。
 |
 |
除非特別寫明，否則本文所有時間都係以UTC+8時間為準。
Remove ads
經過
2023年6月2號下晝5點10分，喺香港鑽石山荷里活廣場嘅閉路電視片段記錄到有一個光頭男子，着住白色背心，斜孭袋，喺商場3樓一間精品店外行。突然之間，佢拎刀向一個短髮女子背後攻擊。短髮女子跌倒之後，攻擊者繼續朝佢心臟位置拮刀，短髮女子嘅朋友係一個長髮女子（22歲），拉住短髮女子並試圖保護佢。短髮女子再次倒地，長髮女子一邊拉住佢，光頭男子一邊追，並揮刀向長髮女子。最後，短髮女子已經無反應地躺喺地上，前後被拮最少30幾刀，而同行女子中刀後倒臥喺一間莎莎化妝品店前[2][3]。
根據警方同商場另一組閉路電視片段，喺案發當日下晝5點，兇徒單獨入咗荷里活廣場，然後去到2樓「生活館（Life Kan）」家品店買咗一把長約12吋未開封嘅刺身刀，之後喺3樓遊走幾分鐘，等佢用作兇器[4][5][6]。
警方到場之前，有好多市民（其中包括一個聖約翰救傷隊成員同童軍領袖）即刻進行急救同阻止兇徒[7]，仲有個附近粵式酒樓聯盛宴嘅廚師「輝哥」用凳擊中兇徒頭部，成功制止攻擊[8][9][10][11]。警方話收到好多市民報案，警員喺收到報案後4分鐘內（下午5時14分）就到場，最終兇徒稍微抵抗咗一下就被警方制伏。案發現場到處都係血同紙巾[12][13][14][3]。
Remove ads
各方反應
個別人士
林作
案件發生後，林作立即喺社交平台發文「抽水」，講自己買嘅波鞋同兇手嘅一樣。文章一出，即刻畀好多網民批評，有啲網民話佢「冇人性」。不過之後喺一份聲明度，佢表示絕對唔會為呢單事件道歉，最後自己刪咗呢篇post[15][16][17][18]。
爭議
《文匯報》、《大公報》以及無綫電視發放假新聞
喺針對兇手動機以及佢同受害人嘅資料方面，《文匯報》、《大公報》、《東方日報》、《點新聞》以及無綫電視《東張西望》都先後發放受害人同兇手有關嘅假新聞，話事件涉及情殺，但警察之後公開回應話無證據顯示兇手同受害人相識。呢啲發放假新聞嘅行為受到一啲批評[19]。其中時事評論員黃世澤就話，呢啲中聯辦宣傳部門為掩飾政府責任乜都講得出，亂作新聞中共先係專家[20] 。時事評論員馮睎乾就話，當初因為《文匯報》、《東方日報》、《東張西望》同埋《點新聞》嘅報道，結果大家討論嘅都係「情殺」故事，任何報道嘅結果就係向死者家屬嘅傷口撒鹽，呢啲媒體作為罪魁禍首，喺警察澄清之後亦無道歉，只係偷偷刪改網上報道，換個標題，當乜事都無發生，做法係侮辱死者同埋對家屬做成二次傷害。馮睎乾又話，相比起之前有線新聞主播跳舞片段風波，呢啲先係真正「A true disgrace to the craft of journalism」[21]。
註釋
參考
參見
Wikiwand - on
Seamless Wikipedia browsing. On steroids.
Remove ads