青磚

青磚，磚一種，實情話磚色灰中帶青。青喺舊時遍及藍綠一類色，深色就近黑。大明大清時至常見屋宇材料。睇起來近自然而收斂。

青磚。九龍寨城公園

青磚原本同赤磚一樣，黏土含鐵，燒磚時會氧化成赤色，即三氧化二鐵^[1]。然而下一步同赤磚唔同，赤磚由得佢自己凍返，而青磚要磚窯頂加水，滲入窯中化成蒸汽，並且密封，嗰陣水汽同炭化合，生出二氧化碳、一氧化碳^[2]。就咁一氧化碳成還原劑，三氧化二鐵會因缺氧，經還原反應化成四氧化三鐵、氧化亞鐵、甚至鐵，歷時五七日^[3]。磚色自始化灰青。青磚有時浸桐油，以增加佢抵抗風化能力^[4]。

青磚製作步驟多啲，要燒得火大啲，時間亦耐一啲，成本貴過赤磚^[5]。然而舊時以佢堅固耐用，實得得，少氣孔，抵風化、扺雨、抵雪^[3]，舊時就用來起屋起城牆，甚至大明起萬里長城都有用青磚。青磚難啲用機械生產，經濟上難以同現代物料競爭，不過就仍會用喺修葺古蹟之上，新樓好少用到，除非構思成懷舊風格^[5]。

青磚進一步技術可以燒成金磚，金磚更實，敲起來聲似五金，用喺紫禁城^[6]。

原料上，青磚單用黏土，多數就地取材。唔似西洋磚會混入其他碎石雜質。黏土實情為鋁矽酸礦物^[5]。

土木

明長城用到青磚，約五百年咁耐

西安城牆青磚砌成

青磚順陶磁工藝而來，何時有青磚，並無明確講法。上古用到泥磚，周開始有燒磚，考古上東周出現青磚^[7]，然而當時唔見得大量咁用。大唐到大元間，青磚多數用來起塔^[7]。而青磚到大明時大行其道，城牆會用到青磚，名勝萬里長城就用咗青磚來起。一般民家都用青磚起屋。而大宅行徑都有用青磚砌。

廣州陳氏書院用青磚起

青磚喺嶺南都好常見，嶺南風格一部份。

香港盛屋村青磚屋宇

香港大埔中心圍亦叫青磚圍，屯門有村叫青磚圍。可見呢處青磚大清時至常用屋宇材料。香港開埠都有用青磚起樓^[8]。