面積

面積係指平面或者曲面上面一個區域嘅大細嘅量度。平面面積係講緊一個平面圖形嘅面積，而表面積就係講緊一個開放曲面或者立體幾何物體嘅邊界嘅面積。面積可以理解為製造一個模型所需要嘅材料嘅數量，又或者係要用一層油漆將表面油滿所需要嘅油漆量。^[1]面積係平面曲線嘅長度（一維概念）同體積（三維概念）嘅二維類比。兩個唔同嘅區域可以有相同嘅面積（好似化圓為方咁）。

靠數格仔可以計到圖案嘅面積

一個圖形嘅面積可以通過同固定大細嘅正方形比較嚟測量。^[2]喺國際單位制（SI）入面，面積嘅標準單位係平方米（寫做 m²），即係一個邊長為一米嘅正方形嘅面積。^[3]一個面積為三平方米嘅圖形就會有同三個呢啲正方形一樣嘅面積。喺數學入面，單位正方形被定義為面積為一，而任何其他圖形或者表面嘅面積都係一個無量綱嘅實數。

有好多簡單圖形嘅面積公式都係大家熟知嘅，例如三角形、長方形同圓形。用呢啲公式，任何多邊形嘅面積都可以通過將多邊形分割成三角形嚟計算。^[4]對於邊界係曲線嘅圖形，通常要用微積分嚟計算佢嘅面積。事實上，要確定平面圖形嘅面積呢個問題係微積分歷史發展嘅一個主要動力。^[5]

單位

面積量度單位:

平方米 = 國際標準單位

公畝 = 100 平方米

公頃 = 10,000 平方米

平方千米 = 1,000,000 平方米

平方百萬米 = 10¹² 平方米