音譯

音譯（粵拼：jam1 jik6）係指做翻譯翻外語文本嗰陣，齋靠外語詞嘅發音，由目標語言嗰度搵發音相近嘅詞或形態素嚟對應，亦有可能係成段短語、成句句子甚至全段文本都係用同樣方法嚟譯，同時忽略原文嘅意思^[1]。譬如係英文語句 Let's go! 意思大致係去囉lo3！噉解，句嘢純音譯轉做粵文可作叻士高！

想像上兩個世紀嘅香港人同澳門人：呢種生果叫咩名？
英倫人：Strawberry。
香港人同澳門人（嘗試跟英倫人講）：ssss... si6... si6 do1 be1 lei2，一於用士多啤梨呢幾隻漢字嚟代表啦。

喺大中華地區（以至日韓）詞層面嘅音譯成日會用嚟處理漢字圈外嘅人名、地名、牌子名以及科技詞彙等。不過唔同漢語－譬如係粵語對比官話，或者粵語對比閩南話－由於喺音系上有差異，對同一隻漢字嘅讀音可以好唔同，所以跟粵語音譯同埋跟官話音譯，出嘅漢字名都會有所不同。

概論

睇埋：翻譯、仿譯同音系

音譯唔一定反映原詞嘅意思，主要係保留其語音特徵。

係咪要音譯，視乎好多因素，包括係社會習慣、詞彙來源、以及音譯可唔可行... 等等。

譯自歐語

英到粵

將英語詞轉做粵語，通常係根據原詞嘅發音，搵一啲粵語讀音相近嘅漢字去對應。假想要將幾隻英語詞譯做粵語：

英詞	粵拼近音	近似漢字
Bus	bat1 si2	巴士
Chocolate	chok3 lit6	朱古力

英到官

喺粵港地區，有啲音譯嘅用字係跟官話發音嚟配對嘅。例如英倫科學家艾碩牛頓個姓噉，佢個姓原文英文係：

Newton（/ˈnjuː.tən/）

喺廿一世紀初，粵語人通常會稱佢為牛頓，但原則上，牛呢隻漢字嘅粵語發音係粵拼：ngau4 而假如要搵一隻漢字嚟對應 new- 應該係要搵一隻粵語讀音以 n- 開頭嘅漢字，例如紐噉。而用牛對應 new- 嘅做法，比較似係跟官話讀音嚟譯－牛嘅普通話讀音係普拼 niú。

就算係噉，粵語群體依然沿用牛頓呢個譯名，而非用（例如）紐頓。原因可能有好多，例如係習慣。

粵官對比

睇埋：入聲

官話同粵語喺音系上有分別，音譯嘅做法亦因而有異。

喺普通話入面，Jack（英語讀音係單一音節嘅）一般會譯做傑克，而克字本身就成一段完整音節存在。呢種做法係基於普通話嘅音系特性：普通話缺乏入聲，唔容許音節以 /-p/、/-t/ 或 /-k/ 做尾，所以齋靠傑一字唔能夠捕捉英語原詞中嘅 -k 音，就要補多橛，加個克（普拼係 kè）字上去，俾 /k/ 自成一個音節^[2]。

相比之下，粵語有入聲，音節可以用 /-p/、/-t/ 或 /-k/ 做尾^[2]，粵語有入聲嘅漢字（譬如係積、的、迫等）可以用嚟對應外語中音節以 /-p/、/-t/ 或 /-k/ 做尾嘅詞彙。例如 Jack 可以譯做阿積或者 Nick 可以譯做阿力呀噉—積粵拼為 zik1 而力粵拼為 lik6，由此可見粵語可以齋靠一段音節，就捕捉晒英語原詞主要嘅音。

譯自日語

睇埋：和製漢字同漢字文化圈

二十世紀起嘅眾漢語有好多詞彙都係嚟自日語嘅^[3]。日語同歐洲語言唔同，傳統上會使用漢字嚟書寫。因此，粵語群體要譯一啲用漢字寫嘅日文詞彙嗰時，就有兩種可能做法：

1. 用粵語音讀佢哋嘅漢字。
2. 根據日語原音嚟音譯。

例子：人氣一詞喺日語入面讀作 ninki（日羅）。如果用「粵音讀漢字」方法嚟譯，可以直接讀做 jan4 hei3－而呢種亦係廿一世紀初粵語人嘅慣常做法^[4]。不過原則上，粵語人可以跟日語個讀音嚟譯，形成 nin5 ki1（近似漢字年奇嘅粵語音）或者類似嘅音。無漢字可寫嘅日語詞彙亦都可以採取純音譯做法。

睇埋

• 粵拼
• 仿譯
• 借詞
• 假借
• 搞笑