香港監察

香港監察（英文：Hong Kong Watch）係一個英國非政府組織，總部位於倫敦，喺2017年成立，宗旨係監察香港人權、自由同埋法治狀態。

香港監察 Hong Kong Watch
創立時間	2017年12月11號，7年之前 (2017-12-11)
目的	監察同埋匯報香港嘅發展
官方語言	英語
信託主席	羅哲斯
贊助人	聶偉敬 嘉芙蓮·韋斯特 艾思定 大衛·阿爾頓 傑弗里·尼斯 彭定康[1][2]
網站	www.hongkongwatch.org

香港監察由英國保守黨人權委員會副主席羅哲斯擔任信託主席，亦包括唔少出名嘅英國政治人物，例如聶偉敬、前自由民主黨黨魁艾思定勳爵等，為唔同有關香港人權同埋自由嘅議題發聲。由於佢哋多番批評中共違反承諾同埋侵犯香港人嘅人權，所以佢哋亦引嚟一啲香港親中派人士批評^[3]，甚至香港政府嘅打壓^[4]。

喺2021年底，佢哋宣布會喺加拿大同澳洲成立分部^[5][6]。

關注議題

宗旨係監察香港人權、自由同埋法治狀態、促請中華人民共和國政府遵守《中英聯合聲明》入面嘅承諾、推動英國政府履行監察香港嘅義務責任同埋推動英國國民（海外）嘅平權工作。

另外，佢哋亦關注持有BNO護照嘅香港人因應香港局勢移民，但被拒絕攞返強積金嘅問題^[7]。針對北京未經諮詢或香港人同意而強行落實嘅《港區國安法》，香港監察亦關注香港政府濫用條例做政治檢控^[8]，以及用嚟打壓民主派組織令佢哋解散（例如：教協）^[9][10]。

事件

香港反送中運動期間

2019年，喺反對逃犯條例修訂草案運動過程入面發生香港警察入侵中文大學校園事件，香港監察發起了學術界聯署，讉責香港警察嘅暴力行為^[11]，又促請香港政府捍衛學術自由同埋成立獨立調查委員會。參與嘅知名學者包括諾姆·杭士基、齊澤克、朱迪斯·巴特勒、揚尼斯·瓦魯法基斯、羅拔·彼得·佐治同埋史迪芬·平克。

網站被香港政府打壓封鎖

喺2022年2月，有網民懷疑香港政府引用《港區國安法》，喺香港封鎖咗香港監察嘅網站。事件引起唔少批評，香港監察行政總裁羅哲斯話，香港作為金融中心嘅未來，取決於資訊係咪可以繼續自由咁流動，要求政府解釋，又話擔心中共將網絡「防火長城」引入香港^[12][4]。英國港僑協會創辦人之一鄭文傑就批評，事件反映香港已經無網絡自由可言^[4]。時事評論員黃世澤就話，事件明顯係林鄭月娥報復被彭定康喺國會當眾狂數，又話香港人要小心申請BNO Visa嘅網站都被封^[13]。