黎偉業

黎偉業，香港詐騙犯，因為涉及2021年大埔比華利山騙案而得到廣泛關注。

生平

佢喺接受訪問嘅時候，表示自己嘅父親經營金融公司，算係「富二代」，但自己立心創業，去到20歲已經爭取自己第一桶金，之後涉獵唔同行業，開咗140間唔同公司，同時亦覺得自己有多一份使命感要回饋社會^[1]。

佢喺2017年創立比華利山獅子會，邀請咗唔少名人同藝人參與，另外亦擔任國際獅子會嘅腎病教育中心及研究基金副主席同埋香港創投基金會榮譽顧問^[1]。

佢又自稱多個頭銜，包括港澳政協委員、首席醫學顧問、全球華人傑出青年等^[1]。

另外，親中派商人彭心亦曾經提及黎偉業係佢心靈導師，彭心喺一啲獅子會嘅活動入面甚至被形容為「黎偉業獅伯徒弟」^[2]。唔少藝人，包括江美儀、陳豪、滕麗名、莊思敏、李施嬅、李力持、洪天明同周嘉蔚都同佢有所聯絡交往。佢又曾經上過J2節目《Big Boys Club》擔任嘉賓，又斥資製作飲食節目《The CEO’s Kitchen董事廚房》^[3]。

2021年大埔比華利山騙案

2021年，黎偉業被指以慈善為名，騙取唔少藝人付錢作投資，聲稱每月有八厘高息回報，投資愈大，利息愈高，但當成功賺取4億元後，就立即消失得無影無蹤，事件之後愈鬧愈大，黎偉業亦被揭發好多佢聲稱嘅名銜，其實都係虛假。有傳洪金寶、謝安琪、江美儀等損失過千萬元，但佢哋就否認被騙^[3][2]。