水族館
From Wikipedia, the free encyclopedia
水族館係用來展出同陳列各種魚類嘅場館。大部份嘅公眾水族館都有數個較細嘅水族箱,同一個或幾個大型水族箱。大型水族箱嘅水容量有成幾千,甚至一萬立方米,可以養大型嘅動物,例如海豚、鯊魚、白鯨。水陸兩棲動物好似水獺、企鵝亦可以喺水族館度養。水族館通常都有專門研究人員,研究園內動物生境同生活規律。
水族館運作上同動物園及博物館相似。一座良好水族館應有特別嘅展覽,包括佢長駐嘅物種,以吸引遊客再次光臨。近年,大型水族館都嘗試取得及育養多個品種嘅海洋魚類,甚至水母。亦有部份水族館設有動物互動園(petting zoo),例如,蒙特利海灣水族館有一個淺水水族箱,養一啲鰩魚,遊客可以摸鰩魚似皮革嘅皮膚。
質素好嘅水族館通常都附設有重要嘅海洋學研究機構,自行進行研究計劃,此外,水族館亦會推行好多同環境,物種保育有關嘅工作。