無政府主義

無政府主義又叫做非統治主義，係一種倫理主張同政治運動。認為國家、政府呢啲嘢係一樣落後嘅觀念，而家已經無需要存在。無政府主義認為，人同人之間地位應該係平等，唔應該有某啲人會有特別嘅權力去強制每一個人嘅生活方式，而國家可以提供嘅嘢，喺任何一個社群都同樣畀到，所以國家、政府呢啲嘢應該要淘汰晒佢就啱。

無政府主義好多時畀人認為係一啲主張暴力，專門搗亂嘅嘢，不過事實上無政府主義者反對用權力作為控制手段，鄙視用武力令人屈服呢種做法。所以喺理論上，無政府主義者唔會強迫人去接受某一樣諗法，佢哋相信可以通過教育同內化，去令人接受無政府主義。呢個諗法係基於克魯泡特金(Kropotkin)嘅性善論而嚟，克魯泡特金認為，只要社會上嘅人可以維持互相扶持嘅合作關係，就自自然然會變好。呢個諗法亦成為好多無政府主義理論嘅基礎，所以無政府主義者相信社群可以取代國家同政府嘅功能，而且行得更有效。

不過現實中就有好多人對無政府主義有一個誤解，認為無政府主義就等如唔講規矩、唔使負責，結果好多時無政府主義者搞親活動，好似集會或者遊行，都會引嚟一啲搞事嘅人。又由於無政府主義者主張廢除國家呢種體制，亦刺激起一啲極右翼愛國主義者嘅情緒，喺無政府主義者搞嘅活動入面，亦有呢啲愛國主義者混咗入去搞事，而呢啲衝突嘅畫面出現喺傳媒上，政府、政黨或者相關嘅組織就乘機利用呢啲衝突畫面，去作為削弱無政府主義說服力嘅工具。

參考

拎