紅磡
From Wikipedia, the free encyclopedia
紅磡(Hung Hom或者Hunghom)係香港九龍半島嘅舊區,如果用紅磡三約嘅廣義範圍就包埋紅磡灣、黃埔、大環、鶴園、老龍坑同埋土瓜灣。行政上來睇,大部份嘅地方都喺九龍城區內,但亦都有少部份好似香港理工大學、香港體育館同埋香港海底隧道九龍入口喺油尖旺區。
家下呢區多數係住宅樓,公共屋邨同私人屋苑。不過舊時紅磡有工業好似黃埔船塢、商業、但隨住舊區重建,以及紅磡灣大規模填海,連紅磡碼頭亦都要搬,而家黃埔亦都包括喺紅磡區內,呢區差唔多係純住宅區。新填海地有私人屋苑半島豪庭、海灣軒、香港理工大學學生宿舍等等。
另外紅磡亦係殯儀行業嘅集中地,喺暢行道、暢通道同溫思勞街一帶,有三間大嘅殯儀館同埋九龍公眾殮房,加埋附近啲整花牌嘅花店、棺材舖、私人骨灰龕(樓上舖)同其他殯儀行業舖頭,附近嘅酒樓亦常年供應解穢酒套餐,喺呢區嘅一大特色。