羅密歐與朱麗葉 (芭蕾舞劇)
From Wikipedia, the free encyclopedia
《羅密歐與朱麗葉》(粵拼:lo4 mat6 au1 jyu5 zyu1 lai6 jip6;英文:Romeo and Juliet;俄文:Ромео и Джульетта)係由俄羅斯大作曲家浦羅哥菲夫(Prokofiev,全名係 Sergei Sergeyevich Prokofiev)作曲嘅一齣芭蕾舞劇,首次喺 1938 年公演於捷克布爾諾(Brno)。呢齣芭蕾舞劇初頭並唔算受歡迎,但幾年後由各編舞師幫手改編,最後令齣劇大受歡迎,仲有美國、丹麥同德國等地嘅芭蕾舞團將齣劇重複表演同改編,成為咗廿世紀芭蕾舞上嘅一齣重要劇目,係浦羅哥菲夫嘅芭蕾舞作曲事業上最重大嘅成功[1][2]。
羅密歐與朱麗葉芭蕾舞劇係一齣愛情悲劇,故仔取自同名莎翁名著,一般分做四幕九個景:第一幕大致講羅密歐同朱麗葉墮入愛河嘅過程;第二幕講提伯特(Tybalt;朱麗葉個表哥)殺死咗羅密歐個朋友,而羅密歐還手中途殺死咗提伯特,令兩家關係瞬速惡化同羅密歐被流放;第三幕講朱麗葉俾佢阿爸阿媽安排同一個佢哋鍾意嘅男人相睇,但朱麗葉因為冇得同羅密歐喺埋一齊而服毒假死;最後第四幕講羅密歐去到朱麗葉嘅墓穴,以為朱麗葉真係死咗,悲憤之下自殺,醒咗嘅朱麗葉見到羅密歐死咗,跟住佢一齊自殺[3][4]。