英文純化運動
努力噉減少喺英文入面嘅外來詞 / From Wikipedia, the free encyclopedia
英文純化運動(英文:English linguistic purism),個英文名直接意譯可以叫英文語言純淨主義,係有關英文嘅一套理念,旨在想清除英文入邊存有嘅外來影響,包括想啲人停用英文有嘅外來詞。佢哋嘅最終目標係要推廣一套「新英文」(所謂嘅 Anglish)—即係話呢套諗法係想令英文「純淨啲」。
英文呢隻語言,查實受過無數咁多隻語言影響:英文本身就有一啲固有嘅日耳曼詞彙同用法;但除此之外,英文仲同好多唔同語言接觸過,吸收咗拉丁文、法文以至粵語等好多唔屬日耳曼系嘅語言嘅嘢,最後形成現代英文。英文純化運動嘅思想重心,就係想改造英文圈嘅人講嘢同寫嘢嘅方式,去除呢啲非日耳曼嘅外來影響。
英文純化呢家嘢唔算好主流,但係都有一定數量嘅支持者。據講就連鼎鼎大名嘅 19 世紀英倫作家查理斯·狄更斯都試過表態支持英文純化[2]。