英聯邦運動會
From Wikipedia, the free encyclopedia
英聯邦運動會(英文:The Commonwealth Games)係英聯邦國家每四年舉辦一次嘅運動會。呢個運動會首次舉辦喺1930年,當時佢叫大英帝國運動會(The British Empire Games)。1954年改叫大英帝國英聯邦運動會(British Empire and Commonwealth Games),又喺1970年改叫不列顛英聯邦運動會(British Commonwealth Games),然後响1978年換成而家嘅英聯邦運動會(The Commonwealth Games)。
除咗奧運會嘅熱門運動項目,英聯邦運動會嘅運動項目方面亦包含咗一啲流行於英聯邦國家嘅項目例如草地滾球、七人橄欖球同無網籃球。目前,一共有53個英聯邦國家同71個隊伍參與呢個運動會。英聯邦運動會嘅運動員人數通常高達5000人。呢個使到英聯邦運動會係其中最多運動員參與嘅國際運動盛會之一。
英國嘅4個組成部分—英格蘭,蘇格蘭,威爾斯同北愛爾蘭—都派出各自嘅嘅隊伍參加英聯邦運動會,重有一啲英國皇家屬地例如,安圭拉島,澤西島,曼島同一啲英國海外領地地區都派出各自獨立嘅嘅代表團參賽。
只有六支代表隊曾參加全部歷屆以來嘅英聯邦運動會:澳洲、加拿大、英格蘭、紐西蘭、蘇格蘭及威爾斯。