飛 (架生)
From Wikipedia, the free encyclopedia
飛,書面語叫票、入場券,係一種入場証明,通常都要畀錢,例如用嚟:入閘搭車、睇戲、睇演唱會或進入其他收費活動場地等。有啲免費活動需要限制入場人數,都需要先向主辦單位攞飛。
飛通常係紙造,有兩部分,入場嗰陣時工作人員會搣走短嗰部份,剩低嘅部份叫飛尾。亦有啲係膠造,飛嘅背面有磁帶,用喺自動入閘機。
飛出自唐朝「飛錢」。飛錢係類似而家嘅支票。唐朝嗰時,商賈嫌帶真金白銀出入好重,易俾人打劫,就稟報朝廷,想以飛錢代真金白銀。《新唐書食貨四》「時商賈至京師,委錢諸道進奏院及諸軍、諸使富家,以輕裝趨四方,合券乃取之,號飛錢。」所謂飛錢,係要揸住飛尾,去進奏院,對返飛頭,先兌得返做真金白銀。呢種飛尾對飛頭嘅做法叫「合券」。由於唔使自己運錢,揸飛仔就可以喺第二處攞錢,啲錢好似曉飛咁,唐朝嘅支票就叫做飛錢喇。