香港仔
香港地方 / From Wikipedia, the free encyclopedia
香港仔(英文:Aberdeen,《香港雜記》繙鴨巴顛),係香港一笪地方,喺香港島南岸,係香港個名嘅發源地,以漁港聞名於世,係遊客熱門地點。
香港仔對出,同鴨脷洲之間嘅香港仔個港(香港仔灣,石排灣,Aberdeen Bay),就劃咗做香港仔避風塘。而港東南出海口,叫香港仔海峽(Aberdeen Channel)。
香港仔以住宅區為主,中間夾住工廠大廈。而香港仔海面有好多漁船,海鮮聞名中外。
家下香港仔中心地帶係田灣以東、石排灣邨以南、黃竹坑以西嘅地方,有時又會叫做香港仔市中心。
行政上,香港仔歸南區管。