鰂魚涌
From Wikipedia, the free encyclopedia
鰂魚涌(英文:Quarry Bay)位於香港島東區。喺香港歷史嘅分區之中,鰂魚涌係北角嘅一部份,包括早期分區、市政局分區以及校網分區。但根據規劃署劃分而家已獨立發展,不過部分人仍講北角係舊稱呼。鰂魚涌嘅西部前稱麗池,因已結業嘅麗池夜總會而得名。
鰂魚涌原本係條涌,南向北流入連埋維多利亞港一個海灣。以前太古洋行睇中呢帶雖然遠離人煙,又近維港,水路交通方便,後面又有水源,啱起工廠同住人,所以響度大興土木,有糖廠、有汽水廠、有曾經輝煌嘅太古船塢。鰂魚涌英文名Quarry Bay,就係因為呢度曾經係石塘,用來採石。後尾太古將船塢搬走,變成今日太古城。而糖廠就變成太古坊。