Mu Columbae
From Wikipedia, the free encyclopedia
Mu Columbae (μ Columbae / μ Col / HD 38666 / HR 1996)[6][7] ye una estrella na constelación de Columba de magnitú aparente +5,18. Alcuéntrase a unos 1300 años lluz de distancia del Sistema Solar.
Mu Columbae ye una estrella azul bien caliente de tipu espectral O9.5V con una temperatura superficial de 33.700 K. Como correspuende a esti tipu d'estrelles, la so lluminosidá ye bien grande: incluyida una gran cantidá de radiación emitida como lluz ultravioleta, ye 23.300 vegaes más lluminosa que'l Sol. El so radiu ye 4,5 vegaes más grande que'l radiu solar y, como ye carauterísticu d'esta clase d'estrelles, rota a gran velocidá —más de 140 km/s—, completando una vuelta en menos de día y mediu. La so masa envalórase unes 12 vegaes mayor que la masa solar. Un fuerte vientu estelar que sopla dende la so superficie fai que pierda masa a razón de 0,1 millonésimes de la masa solar cada añu.[8]
La carauterística más notable de Mu Columbae ye que, al igual que AE Aurigae, ye una estrella fuxitiva. Allóñase direutamente d'esta postrera a más de 200 km/s; anque n'otru tiempu tuvieron xuntes, agora tán dixebraes visualmente 70º. Estudiando les sos trayectories nel pasáu, atopóse que los sos caminos cruciáronse fai 2,5 millones d'años, y que dambes estrelles tamién tán rellacionaes con Hatysa (ι Orionis), un sistema estelar que la so componente principal ye una binaria cercana con una órbita notablemente escéntrica. Piénsase que se produció un choque ente dos estrelles binaries, que'l so resultancia foi que dos de les estrelles intercambiaron posiciones y otros dos —Mu Columbae y AE Aurigae— fueron despidíes a gran velocidá al traviés del espaciu.[8]