Tau Canis Majoris
estrella / From Wikipedia, the free encyclopedia
Tau Canis Majoris (τ CMa / 30 Canis Majoris / HD 57061)[7] ye una estrella na constelación de Canis Maior, la más brillosa del cúmulu abiertu NGC 2362. De magnitú aparente +4,37, alcuéntrase a una distancia averada de 4800 años lluz del Sistema Solar.
Tau Canis Majoris ye una superxigante azul del pocu frecuente tipu espectral O, en concretu O9Ib. Forma parte d'un sistema estelar masivu de siquier cinco componentes. En primer instancia Tau Canis Majoris ye una estrella triple, con dos estrelles de magnitúes 4,9 y 5,3 separaes 0,15 segundos d'arcu, y una estrella más tenue de magnitú 10 a 8 segundos d'arcu. De les componentes del par interior, una d'elles ye una binaria espectroscópica con un periodu orbital de 155 díes. De la mesma, una d'estes estrelles ye una binaria eclipsante del tipu Beta Lyrae, nesti casu con un periodu orbital de namái 1,28 díes.[8]
La lluminosidá conxunta de los cuatro estrelles interiores equival a 500.000 soles, lo que suxure mases medies de 20 mases solares. La separación ente les componentes del par interior eclipsante ye de 0,10 UA, tando esta binaria aproximao a 5 UA de la siguiente componente. La cuarta componente orbita a una distancia de 223 UA respectu al tríu anterior, ente que la postrera y más tenue estrella tópase alloñada siquier 13.000 UA. Son toes estrelles bien nueves, con una edá de tan solo 5 millones d'años.[8]