Patti Smith
From Wikipedia, the free encyclopedia
Patti Smith (Patricia Lee Smith) (fædd 30. desember 1946)[1] er bandarísk söngkona, lagasmiður, ljóðskáld og myndlistarkona sem var mikill áhrifavaldur pönkhreyfingarinnar í New York með fyrstu plötu sinni, Horses, árið 1975.
Patti Smith | |
---|---|
Upplýsingar | |
Fædd | Patricia Lee Smith 30. desember 1946 (1946-12-30) (77 ára) |
Uppruni | Chicago, Illinois, Bandaríkjunum |
Stefnur | Pönk-rokk |
Hljóðfæri | Gítar, klarinett |
Útgefandi | Arista, Columbia |
Vefsíða | http://www.pattismith.net |
Smith er þekkt fyrir að blanda saman rokki og ljóðlist í verkum sínum. Þekktasta lag hennar er Because the Night, sem hún samdi ásamt Bruce Springsteen. Lagið komst í 13. sæti Billbord Hot 100-listans árið 1978 og í 5. sæti í Bretlandi. Árið 2005 sæmdi franska menntamálaráðuneytið Patti frönsku Lista- og bréfaorðunni (franska: Ordre des Arts et Lettres).[2] Árið 2007 var hún sett inn í Rock and Roll Hall of Fame.[3]
Þann 17. nóvember 2010 hlaut Smith bandarísku viðurkenninguna National Book Award fyrir endurminningar sínar, Just Kids.[4] Í bókinni fjallaði Smith um samband sitt við lífsförunaut sinn, Robert Mapplethorpe, og sagðist hafa uppfyllt loforð sem hún gaf honum á dánarbeði hans með útgáfu bókarinnar. Árið 2010 lenti Smith í 47. sæti á lista tímaritsins Rolling Stone yfir 100 bestu listamenn allra tíma.[5] Hún hlaut einnig sænsku Polarverðlaunin árið 2011.