Flumen Grande
From Wikipedia, the free encyclopedia
Flumen Grande,[1] sive Fluvius Grandis,[2] seu Flumen Palmarum[3] (Anglice Rio Grande; Hispanice in Mexico Río Bravo del Norte et Río Bravo), est unum e principalibus fluminibus (cum Flumine Colorato) in Civitatibus Foederatis meridianis et occidentalibus et in Mexico septentrionali.[4][5] Fluminis aquae ex Colorato meridiano medioque in Civitatibus Foederatis exoriuntur; longitudo fluminis, qui in Sinum Mexici defluit, est 3051 chiliometra.[6] Area fluminis pelvis siccatoriae est 471 000 chiliometrorum quadratorum,[7] sed pelves endorheicae ad et intra maiorem fluminis pelvem omnem aream siccatoriam usque ad 870 000 chiliometrorum quadratorum augent.[8]
Flumen Grande, postquam omne Novum Mexicum peragrat, finis Mexici et Civitatum Foederatarum fit, inter Texiam civitatem Civitatum Foederatarum et Chihuahua, Coahuila, Novam Legionem, et Tamaulipas septentriones Mexici civitates; praeterea, breve fluminis segmentum fines partim constituit inter Novum Mexicum et Texiam, civitates Civitatum Foederatarum. Ex medio autem saeculo vicensimo solum 20 centesimae fluminis aquae Sinum Mexici attingunt, plerumque quia aqua magna ex parte ad agriculturam irrigandam avertitur, praecipue in inferiore Fluminis Grandis parte, et ad aquam urbibus praebendam, atque tales aquae summae totam aquae summam in receptaculis per moles diversionis retentam excedunt.[9]
Inter faunam notabilem in Valle Fluminis Grande numerantur Phocides polybius (Hesperiidae), Rhinella marina (Bufonidae), Oncorhynchus clarki virginalis (Salmonidae), Dionda diaboli (Leuciscidae), et praesertim Hybognathus amarus (Leuciscidae), unus e maxime periclitatis piscibus in America Septentrionali endemicis.