Songket Minangkabau
Kain tanun jinih brokat nan barasa dari Minangkabau. / From Wikipedia, the free encyclopedia
Songket Minangkabau adolah kain tanun tradisional sajinih songket nan barasa dari Minangkabau.[1] Songket ko alah manjadi identitas budayo dalam tradisi Minangkabau. Kain songket ko digunoan baiak untuak bahan pakaian maupun bahan pambuatan karajinan tangan lainnyo. Ado baragam jinih motif sarato filosofi dalam tiok motifnyo nan alah diwarisi sacaro turun tamurun sainggo dipakai pulo dalam alek adat.
Daulu ado banyak sentra songket Minangkabau di Sumatera Barat. Di antaro sentra songket nan tanamo iyolah Pandai Sikek, Silungkang, jo Kubang. Songket Minangkabau alah panah manjadi tema gambar pado pitih karateh rupiah emisi 2011, iyolah gambar pananun songket Pandai Sikek.[2]