Stroke
panyakik nan disababkan dek pambuluah darah nan manyampik ka utak / From Wikipedia, the free encyclopedia
Stroke (dibaco: strok) adolah karusakan jaringan utak baiak sabagian atau sadoalahannyo nan tajadi mandadak, balansuang labiah dari 24 jam sarato disababkan dek faktor-faktor masalah pambuluah darah (vaskular). Pambuluah darah arteri nan maaliakan darah ka utak tasumbek, kuyak, atau tirih.[11]
Artikel ko maagiah informasi dasa tantang topik kasihatan. Informasi dalam artikel ko buliah digunoan anyo untuak panjalehan ilmiah, bukan untuak diagnosis diri dan indak dapek manggantian diagnosis medis. Paratian: Informasi dalam artikel ko bukanlah resep atau nasihaik medis. Wikipedia bukan pangganti dotor. Kok Sanak paralu bantuan atau ka barubek bakonsultasilah jo tanago kasihatan profesional. |
Stroke | |
---|---|
Namo lain | Cerebrovascular accident (CVA), cerebrovascular insult (CVI), sarangan utak |
CT scan utak nan manunjuakan sisi kiri utak nan maalami kakurangan darah (iskemik) dari sumbatan pado arteri. Parubahan pado CT buliah jadi indak tampak pado gejala mulo[1] | |
Spesialisasi | Neurologi |
Gejala | Indak talok manggarik atau marasoi pado ciek sisi badan, masalah mamahami bahaso atau mangecek, paniang, ilang pandangan di ciek sisi[2][3] |
Komplikasi | Kondisi vegetatif persisten[4] |
Panyabab | Iskemik (sumbatan) jo hemoragik (padarahan)[5] |
Faktor risiko | Takanan darah tinggi, marokok, obesitas, kolesterol darah tinggi, diabetes mellitus, riwayaik TIA, fibrilasi atrium[2][6] |
Diagnosis | Manuruik gejala sarato pancitraan medis biasonyo untuak manyingkiran kamungkinan padarahan[7][8] |
Kondisi sarupo | Gulo darah randah[7] |
Parawatan | Manuruik tipe[2] |
Prognosis | Harapan iduik rato-rato 1 taun[2] |
Frekuensi | 42,4 juta (2015)[9] |
Kamatian | 6,3 juta (2015)[10] |
Stroke atau cerebrovascular accident (CVA), marupokan ilangnyo fungsi-fungsi utak sacaro capek, dek gangguan suplai darah ka utak. Hal iko dapek tajadi dek iskemia (bakurangnyo aliran darah) nan disababkan juo dek panyumbekan (thrombosis, arterial embolism), atau adonyo padarahan (haemorrhage).[12]
Stroke iskemik nan biasonyo disababkan dek diabetes manjadi mayoritas pado pandarito stroke sarato bisa mancapai 85 persen, sadangkan stroke padarahan hanyo 15 persen, tapi stroke padarahan dapek manyababkan kamatian pado 40 persen pasiennyo. Nan juo manjadi paratian adolah stroke iskemik ringan nan gejalanyo sarupo stroke, tapi ka ilang surang dalam 24 jam (transient ischemic attacks (TIA)). Hal iko tajadi dek pambuluah darah hanyo tasumbek samantaro. Ka baapun juo, kok lah kanai sakali, stroke nan labiah barek dapek muncua di kudian ari.[13]
Stroke adolah panyabab katigo kamatian paliang banyak sarato panyabab utamo kacacatan pado urang gadang di Amerika Serikat jo Eropa. Manuruik laporan Riskesdas 2007 (Riset Kesehatan Dasar), stroke pun marupokan panyabab kamatian partamo di Indonesia. Stroke tajadi pado 12 dari 1.000 urang jo ciek dari 7 pasien nan maalami stroke ka maningga.[14]
Stroke paralu tindakan darurat medis (medical emergency) pado maso amehnyo (golden period) nan paliang lamo hanyo balansuang babarapo jam sajo sasudah tajadinyo stroke. Hal ko diparalukan untuak manahan tajadinyo karusakan tatap atau karusakan nan labiah parah. Kok indak ditangani, malah bisa barakibaik pado kamatian. Dek itu, daerah utak nan takanai stroke indak dapek bafungsi samustinyo. Gejala-gejalanyo tamasuak: hemiplegia (kaindakmampuan untuak manggarikan ciek atau labiah anggota badan dari salah satu sisi badan), aphasia (kaindakmampuan untuak mangarati atau mangecek), atau kaindakmampuan untuak mancaliak salah satu sisi dari lapangan pandang (visual field).[15]
Faktor-faktor nan maningkekan risiko tajadinyo stroke adolah: umua, takanan darah tinggi, riwayaik stroke sabalunnyo, diabetes, kolesterol tinggi, marokok, fibrilasi atrium, migrain jo aura, sarato trombofilia (kacondongan untuak thrombosis). Dari sadoalah faktor-faktor tu nan paliang mudah dikandalikan adolah takanan darah tinggi jo marokok. 80 persen stroke dapek diilakan jo pangandalian faktor-faktor risiko.[16]