控制理論
From Wikipedia, the free encyclopedia
控制理論(粵拼:hung3 zai3 lei5 leon6;英文:control theory),又有叫控制論,係一套應用數學框架,旨在將運作緊嘅動態系統概念化噉想像做數學模型,並且分析呢啲系統可以點樣用各種嘅方法嚟控制[1]。呢類噉嘅分析喺工程學以至物理學上都成日會用到[2]。
例如回輸迴圈(feedback loop)就係一種簡單嘅控制系統,一個回輸迴圈系統會攞某啲嘢做輸入,俾出個輸出,個輸出跟住又會向個系統提供返回輸(feedback)-而如果吓回輸係負回輸,就會壓抑個系統嘅運作,令個系統慢慢噉停低[3][4];舉個具體啲嘅例子[註 1],想像家陣要設計架自駕車,架車有感應器曉探測自己嘅速度係幾多(可以睇埋巡航定速[5]),
- 設架車嘅速度做 ,如果架車探測到 (輸入; 係個事先揀好咗嘅值),個輸入就會啟動架車嘅加速系統 (輸入傳俾系統);
- 跟住會傳訊號去車碌掕住嘅軸度令啲車碌旋轉,從而令架車提升速度(輸出);
- 同時 又事先設好咗,一旦開始提升速度(輸出), 就要開始壓抑自己嘅活動(負回輸)-於是架車加速加到咁上下就唔會再加,達致「架車唔會超過安全速度」噉嘅效果。
進階嘅控制理論仲會分析更加複雜嘅系統,並且用數學方程式表達個系統嘅各個特性之間成咩關係,工程師等嘅人員就會用呢啲數學模型嚟嘗試剖析「個系統要點改良」等嘅問題[1]。除此之外,控制理論嘅分析方法仲有擴散到去心理學等嘅社科嗰度,俾人攞嚟分析人嘅某啲行為[6]。