From Wikipedia, the free encyclopedia
Die Havel ['haːfəl] is 'n rivier in die noordooste van Duitsland. Met 'n lengte van 334 kilometer is dit die langste regterkantse syrivier van die Elbe, alhoewel die reguitlynafstand tussen sy oorsprong en monding met slegs 94 kilometer aansienlik korter is.
| Havel | |
|---|---|
 Rivierloop van die Havel (donkerblou) | |
| Oorsprong | Naby Ankershagen, Mecklenburg-Voorpommere |
| Monding | Elbe naby Gnevsdorf, Brandenburg |
| Stroomgebied | Deelstate Mecklenburg-Voorpommere, Brandenburg, Berlyn en Sakse-Anhalt |
| Lengte | 334 km |
| Oorspronghoogte | 62,6 m |
| Mondinghoogte | 22 m |
| Gemiddelde afloop | 108 m³/s |
| Stroomgebiedopp. | 23 858 km² |
Die Havel ontspring in die deelstaat Mecklenburg-Voorpommere, vloei deur Brandenburg, Berlyn en Sakse-Anhalt en mond naby die grens tussen Brandenburg en Sakse-Anhalt in die Elbe uit. Die rivier vloei eers deur talle klein mere in suidelike, daarna in westelike en uiteindelik in noordwestelike rigting. Die hoogteverskil tussen sy oorsprong en sy monding beloop net 40,6 meter. Sy gemiddelde afloop is met 108 kubieke meter per sekonde (m³/s) die derde grootste van alle Elbe-syriviere ná die Moldau (150 m³/s) en die Saale (115 m³/s).
Die Havel loop oor 'n afstand van 285 kilometer deur Brandenburg. Die grootste deel van sy rivierloop is bevaarbaar, waarby sy diepte en afloop deur damme en sluise gereguleer word. 'n Groot getal sykanale dien as afkorting vir skepe. Alhoewel die Havel as waterweg uitgebou is, kan die rivier danksy die talle natuurlike mere, waardeur dit loop, groot hoeveelhede water stoor. Sodoende bly sy waterpeil ook in lang droë periodes onveranderd. Hoë waterpeile kom nouliks voor en is gewoonlik beperk tot die Havel se benedeloop waar vloedwater van die Elbe kan binnestroom.
Die grootste syrivier van die Havel is die Spree - 'n rivier waarvan die watervolume meer as twee keer so groot is en wat die Havel ook ten opsigte van sy lengte (380 kilometer) oortref. In 2009 is die Havel deur twee Duitse verenigings, die Naturfreunde Deutschlands (Natuurvriende van Duitsland) en die Duitse Hengelaarsvereniging as die "Rivierlandskap van die jaar" aangewys. Sedert 2009 loop 'n fietspad, die Havelradweg, langs die rivier.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
