CASA C-212 Aviocar

Die CASA C-212 Aviocar is 'n turboskroefaangedrewe, mediumgrootte vragvliegtuig met kort-opstyg-en-land vermoë (STOL). Dit is ontwerp en gebou deur Construcciones Aeronáuticas SA (CASA) in Spanje vir beide die militêre en burgerlike marksegmente.

CASA C-212 Aviocar
'n CASA C-212 van die Spaanse Lugmag
Tipe	Veeldoelige vliegtuig
Vervaardiger	Construcciones Aeronáuticas SA EADS CASA Indonesiese Lugvaart
Nooiensvlug	26 Maart 1971
Bekendstelling	Mei 1974
Status	In produksie in Indonesië
Hoofgebruiker	Indonesië
Vervaardig	1971–2012
Aantal gebou	483[1] + >100 (IPTN)
Eenheidskoste	$5.2-8 miljoen (2006)[2]

Gedurende die laat 1960's het die Spaanse Lugmag nog suieraangedrewe vragvliegtuie gebruik insluitend die drie-enjin Junkers Ju 52 en twee-enjin Douglas C-47. Om 'n vereiste van die Spaanse Lugmag se moderniseringsprogram te vervul, het CASA die C-212 voorgestel, 'n tweemotorige 18-sitplek vragvliegtuig wat geskik is om in verskeie rolle gebruik te kan word. Dit is bruikbaar vir die vervoer van passasiers, nood- en ambulansdienste en vervoer van valskermsoldate, asook gebruik in 'n burgerlike omgewing.^[3] Die eerste prototipe het op 26 Maart 1971 sy nooiensvlug voltooi. Die Spaanse Lugmag het in 1974 bestellings geplaas vir die C-212 om sy vloot te moderniseer.