Couscous

Couscous of koeskoes (Berberse taal: kseksu, seksu of seysu) is grof gemaalde durumkoring (griesmeel) wat afkomstig is uit Noord-Afrika. Die griesmeel word via 'n draaitrommel omgevorm na klein bolletjies wat net soos pasta gedroog word. Dit is in verskillende mate verkrygbaar.^[1]

Couscous

Voorbereiding en nuttiging

'n Keskes of couscouspan

Die maklikste en vinnigste manier om couscous te maak is deur dit in water wat plantaardige olie en sout bevat te kook. Tradisioneel word dit egter gemaak in 'n tweedelige Keskes (couscouspan). Hierin word die couscous gestoom, dikwels saam met verskeie groentesoorte. Dit is egter 'n tydrowende proses.

Couscous-geregte word met verskillende bestanddele gemaak, die verskil lê veral in die hoeveelheid en die soorte groente. In Tunisië word die gereg dikwels gegeur met Harissa-sous. In Libië word vis en garnale ook as bestanddeel in couscous-geregte gebruik. 'n Soet weergawe daarvan word met melk gemaak.

Couscous-slaai word voorberei deur die couscous in 'n mengsel bestaande uit koue water, asyn en olyfolie te dompel en dan 'n paar uur te laat staan. Verskeie bestanddele word dan bygevoeg. In Genève byvoorbeeld is "couscous fruits de mer" baie gewild.

Couscous word tradisioneel met die vingers geëet; teenswoordig word daar egter deurgaans van eetgerei gebruik gemaak omrede dit gemakliker en meer higiënies is.

Sien ook

• Semolina (griesmeel)