PRASA

PRASA (afkorting vir Passenger Rail Agency of South Africa, oftewel Passasierspooragentskap van Suid-Afrika) is 'n staatsbeheerde onderneming wat vir meeste van die spoorvervoer in Suid-Afrika verantwoordelik is. Dit bestaan uit vier takke:

• Metrorail, wat spoor-pendeldienste in stedelike gebiede lewer;
• Shosholoza Meyl, wat streek- en inter-stedelike spoordienste lewer;
• Autopax, wat streek- en inter-stedelike busdienste lewer; en
• Intersite, wat die eiendom wat deur PRASA besit word bestuur.

PRASA

Tipe	Staatsmaatskappy
Gestig	1990 (as SARCC)
Hoofkantoor	Johannesburg, Gauteng , Suid-Afrika
Sleutelpersone	Zukile Nomvete (voorsitter van die raad) Tshepo Montana (hoof uitvoerende beampte) Salani Sithole (hoofbedryfsbeampte) David Kekena (hoof finansiële beampte)
Produkte	Vervoer-dienste
Inkomste	4,2 miljard (2007)
Webwerf	prasa.com

Hoof Uitvoerende Beamptes

Term begin	Term einde	Naam
2010	2015	Tshepo Lucky Montana
2016	2017	Collins Letsoalo
2017	2017	Lindikaya Zide
2017	2018	Cromet Molepo
2018	2019	Sibusiso Sithole
2021	tans	Zolani Kgosie Matthews

Korrupsie

'Dr' Mshushisi Daniel Mthimkhulu, algemeen bekend as Daniel Mthimkhulu, het hom sedert 2010 bedrieglik as 'n hoogs gekwalifiseerde ingenieur voorgedoen, wat aan hom 'n opgeblase salaris besorg het, en hom in 'n sentrale rol geplaas het in die verkryging van lokomotiewe. Hy het slegs oor matrieksertifikaat beskik, maar het geroem op 'n nasionale diploma en BTech-graad van die Vaal Universiteit van Tegnologie, 'n meestersgraad van Wits Universiteit, en 'n doktorsgraad in ingenieursbestuur van die Technische Universität München in Duitsland. Danksy hierdie vals geloofsbriewe is hy in 2010 in die senior rol van Uitvoerende Bestuurder: Ingenieursdienste aangestel. 'n Vervalste werkaanbodbrief van 'n Duitse maatskappy (DB Schenker) is gebruik om Prasa te oorreed om sy jaarlikse salaris byna te verdubbel van R1,6 miljoen tot R2,8 miljoen. Hy het gou by die "hoë treine"-skandaal betrokke geraak. Hy was 'n sleutelfiguur in die 2013-verkryging van 13 Afro 4000-lokomotiewe van die Spaanse vervaardiger Vossloh España. Later is bevind dat die treine te hoog was vir Suid-Afrika se standaard-spoorwegnetwerk, wat Prasa miljarde aan verliese en nodige wysigings gekos het. Mthimkhulu is in Januarie 2022 skuldig bevind aan drie aanklagte van bedrog en is in September 2024 tot 15 jaar tronkstraf gevonnis. Die hof het hom ook gelas om R5,7 miljoen in bedrieglik verkrygde verdienste terug te betaal.^[1]