Perseverance (ruimtetuig)

Perseverance, met die bynaam Percy,^[1][2] is ’n verkenningstuig so groot soos ’n motor wat ontwerp is om die krater Jezero op Mars te verken as deel van Nasa se Mars 2020-sending. Dit is deur die Jet Propulsion Laboratory ontwerp en is op 30 Julie 2020 lanseer.^[3] Bevestiging dat die tuig op Mars geland het, is op 18 Februarie 2021 ontvang.

’n Kunstenaar se voorstelling van Perseverance op Mars.

Die eerste foto wat Perseverance kort ná sy landing geneem het, 18 Februarie 2021.

Perseverance het sewe nuwe wetenskaplike instrumente aan boord en het altesaam 19 kameras en twee mikrofone.^[4] Dit het ook ’n mini-helikopter, die Ingenuity, ’n eksperimentele vaartuig wat die eerste kragaangedrewe vlug op ’n ander planeet sal onderneem.

Sending

Die Perseverance het vier wetenskaplike doelwitte, wat deel van die Mars-verkenningsprogram is:^[5]

1. Om uit te kyk vir woonbaarheid; die identifikasie van omgewings wat in die verlede mikrobiese lewe sou kon onderhou.
2. Om te soek na tekens van moontlike mikrobiese lewe in die verlede in dié bewoonbare omgewings, veral in spesiale rotse wat tekens van lewe lank kan bewaar.
3. Die versameling van monsters rots en regoliet ("grond") en die berging daarvan op Mars se oppervlak.
4. Voorbereiding vir die mens; die toetsing van suurstofvervaardiging in Mars se atmosfeer.